Azpeitia Hiria rallyaren 23. edizioa martxan da gaur goizean. 75 auto klasikok parte hartzen dute proban, eta 11:00etan hasi dira banan-banan ateratzen Azpeitiko epaitegiaren aurreko aparkalekutik. Irten aurretik, ibilgailuak ikusgai egon dira bertan, eta jende ugari bildu da ikuskizunaz gozatzera. Lagun Artea eskuderiak antolatu du Maykel del Ciden omenezko rally hau.
Parte hartzen duten autoek 230 kilometroko ibilbidea osatu beharko dute Gipuzkoako errepideetan barrena. Ibilbideak hainbat herri zeharkatuko ditu, tartean Azpeitia, Bidania-Goiatz, Orendain, Gabiria eta Mutiloa. Hainbat geldialdi aurreikusi dira ere; hala nola, Salbatore jatetxean 20 minutuko atsedenaldia, Legazpiko Aitxuri jatetxean 14:00etatik aurrera bi orduko geldialdia, eta Zarautzen 18:00etan ordubeteko atsedenaldia.
Antolatzaileek aurreikusi dutenez, lehenengo autoa Azpeitian izango da 20:00etarako. Behin auto guztiak helmugara iritsitakoan, sari banaketa egingo da epaitegiaren aurreko aparkalekuan bertan.
