Sahatsa dantza taldeak bere mende erdiko urteurrena ospatzen jarraitzen du, eta horren barruan beste jarduera bat antolatu du larunbaterako, hilaren 26rako. Ekitaldia 18:30ean hasiko da Azpeitiko plazan, eta Sahatsa 50 jaialdia izena izango du. Bertan, 70 dantzari eta musikarik hartuko dute parte, egungo taldekideek zein lehenago taldean ibilitakoek.
Dantzariak eta musikariak Basazabal jauregitik kalejiran abiatuko dira, Nafarroa Behereko dantzak eginez herriko plazaraino. Bertan, ordu eta hamar minutuko jaialdia eskainiko dute, besteak beste, Lapurdiko eta Gipuzkoako dantzak, kaxarranka, fandangoa, arin-arina eta zirtzina dantzatuz.
Aurreko asteburuan, hilaren 19an, antzeko jaialdia eskaini zuten Azkoitian, eta ikusmin handia sortu zuen, txalo zaparradak jaso zituen ekitaldi arrakastatsuan.
Horrez gain, joan zen ostiraletik Ezpata dantzariak argazki erakusketa bat dago ikusgai Azpeitiko Betharram aretoan. Erakusketa hau igandera arte, irailaren 27ra arte, egongo da zabalik. Ordutegia honakoa da: astegunetan 18:00etatik 20:00etara eta asteburuetan 12:00etatik 14:00etara.
