Egitasmoak eguneroko bizitzan eragina duten hainbat arlo jorratuko ditu, hala nola ura, energia, elikadura, biodibertsitatea, hondakinak eta klima-aldaketa. Proiektuaren xedea da baliabide horien kudeaketa egungo beharretara egokitzea eta herrian egin daitezkeen urrats berriak zehaztea.
Ekimen hau ez da hutsetik abiatzen; 2025ean martxan jarritako baratze ekosozialak ditu oinarri. Baratze horiek elikagaiak ekoizteaz gain, herritarren arteko ezagutza-trukerako eta komunitatea indartzeko gune gisa balio izan dute. Orain, esperientzia hori herriko beste eremu batzuetara zabaldu nahi dute.
Aurkezpen saioan, orain arte egindako lanaren berri emango dute eta proiektuaren barruan landu nahi dituzten ildo berriak azalduko dituzte. Gorlizek jasangarritasunaren aldeko beste ekimen batzuk ere baditu, hala nola BiziPark zerbitzua, bizikletaren eta garraio publikoaren arteko lotura errazteko sortua.
