Lorke Systems enpresak hornitu eta instalatuko du Kalegoienan berez garbitzen den komun publikoa. Kontratazio Mahaiak egindako proposamena onartu ondoren, lau enpresen artean puntuazio handiena lortu zuen Lorke Systemsi esleitu zaio lana, nahiz eta hasiera batean puntuazio handiena eskaintza merkeena egin zuenak jaso zuen. Azken honek, ordea, ez zituen udalak ezarritako baldintza teknikoak bete, bereziki neurrietan.
Lorke Systemsen eskaintza izan da gainera berme epea urtebetez luzatzea proposatu duen bakarra. Lanen prezioa 53.000 eurokoa izango da, udalak zehaztutako gehienezko prezioa 6.000 euroan merkatu ondoren.
Komun berria erabilera anitzekoa eta desgaitasun funtzionala duten pertsonentzat egokitua izango da. Kabina guztiz automatikoa izango da, euste-barra finkoak, eraisgarriak eta altzairu herdoilgaitzezkoak izango ditu mugikortasun murriztua dutenentzat. Elementu guztiak gune bakar batean egongo dira, eta gela tekniko bat ere izango du langileentzat. Sarrerako ateak elektroimana izango du ordutegi-programazio sistemarekin, eta kanpo-seinaleztapenak komuna libre, okupatuta edo zerbitzuz kanpo dagoen adieraziko du.
Kanpoaldean hiru plazako pixalekua ere instalatuko da, altzairu herdoilgaitzez egina eta pribatutasuna bermatzeko pantailarekin. Elementu hau komun-moduluaren egitura nagusian integratuta egongo da, multzoak unitate funtzional bakarra osatuz.
Komun publiko autogarbigarria Kalegoienako lurrazpiko aparkalekuaren oinezkoen sarreran kokatuko da. Lanek 10 asteko epea izango dute instalazioa amaitzeko.
Kalegoienakoa herrigunean kokatzen den bosgarren komun publikoa izango da, postetxe eta San Lorentzoko autobus geltokietakoak, plaza ondokoa eta ur txorroten parkekoa osatuz.
