Zizurkilgo Udalak konpostari buruzko doako ikastaro labur bat antolatu du apirilaren 15ean, arratsaldeko 18:00etan, Atxulondo kultur etxean. Saio honetan, konpostaren oinarriak, nola egin, zertarako balio duen eta dituen onurak azalduko dira. Herritar guztiei zuzenduta dago, eta parte hartu nahi dutenek izena eman dezakete udalaren egoitza elektronikoan edo udal bulegoetan.

Ikastaro hau Ugare auzoan jarri berri den konpostatze gunearen irekierarekin lotuta dago, zeina apirilaren amaierarako erabilgarri egotea aurreikusten den. Horrela, Ugareko bizilagunek ere auzo-konpostaren sisteman parte hartzeko aukera izango dute. Momentuz, 22 etxebizitza berri gehitu dira sistemara, eta horien kopurua kontuan hartuta antolatu da ikastaroa.

Udalak auzo-konpostaren onurak nabarmendu ditu, hala nola hondakinen kudeaketa herrian bertan modu jasangarrian egitea, sortutako ongarria lurzoruaren egitura hobetzeko erabiltzea (uraren atxikipena eta mikrobio-jarduera sustatuz), eta onura ekonomikoak lortzea. Izan ere, auzo-konpostean parte hartzen dutenek urtean 225 euro ordaindu beharrean, 168,76 euro ordainduko dituzte hondakin organikoen kudeaketagatik. Parte hartu nahi duten zizurkildarrek udal bulegoetan edo Zizurkil.eus webgunean eman dezakete izena.

Proiektu berritzaile honen barruan, Zizurkilgo Udala hondakin organikoen deskonposizio prozesuaren jarraipena egiten ari da. Horretarako, Andoaingo La Salle Institutuko Lanbide Heziketako ikasleek garatutako gailu bat erabiltzen ari dira udaletxe aurreko Herriguneko auzo-konpostatze gunean. Gailu honek konpostaren tenperatura neurtzen du, prozesu naturala bide onetik doala eta sortutako ongarria erabilgarria den ziurtatzeko, konposta 70 gradu inguruan egon behar baita deskonposizio egokia izateko. Laster, guneetan txartel birtualaren sarrailak jarriko dira, erabilera egokia bermatzeko, txartel bakoitza etxebizitza bati lotuta egongo delarik.