Konponketa lanak herriko bost eremutan egingo dira: Etxe Txuriko bidean, Galarreta bidean, Txagalde bidean, Sagasti bidean eta Aldabako bidean. Lanak dagoeneko martxan daude, eta aurreikuspenen arabera, ekainaren 30erako amaituta egongo dira.

Iazko ekaineko euriteek kalte handiak eragin zituzten Alegian ez ezik, eskualdeko beste herri batzuetan ere, hala nola Altzo, Berrobi, Ibarra eta Ikaztegieta. Ikaztegietan, esaterako, bi baserritara —Txarako borda eta Larrunbe txiki— joateko bideak erabat moztuta geratu ziren uholde eta luizien ondorioz.

Bat-bateko ur-erauntsi hark kezka sortu zuen azpiegituren inguruan, batez ere landa-eremua halako ezbeharrei aurre egiteko prest ote dagoen. Gipuzkoako Foru Aldundiak milioi bat euroko kalteak zenbatu zituen gertakariaren ondoren, eta iazko irailean 1,2 milioi euroko partida onartu zuen udalei laguntzeko.