Urtero bezala, Aralarko larreen irekiera festa ospatuko da bihar, maiatzaren lehenean, Larraitzen. Goizeko 10:00etan hasiko da jardunaldia, eta jende ugari espero da festa giroaz gozatzeko, bertako produktuak erosteko eta abereak larretan ikusteko. Azoka bat ere egongo da, non abere erakusketa (behorrak, ardiak, ahariak, astoak, behiak eta ahuntzak), eskulangintza saioak eta bertako jakien salmenta eskainiko diren.

Musika ere ez da faltako, 11:00etan Iker Sukia eta Aritz Markinez trikitilari-pandero jotzaileek girotuko baitute festa. Larre irekiera ofiziala 12:00etan izango da, suziria botatzearekin batera, eta orduan abiatuko dira artaldeak eta behiak Larraizko langatik gora, abeltzainekin batera.

Irekieraren ondoren, abereak larreetan utzita, bertaratutakoek herri kirolez gozatzeko aukera izango dute. Malen Morandeira eta Hodei Iruretagoiena harri-jasotzaileak arituko dira, eta Jakes Iruretagoiena eta Oihana Barrena aizkolariak. Bertsolaritzan, berriz, Maialen Akizu eta Bixente Gorostidi izango dira. Autobus zerbitzua ere egongo da.

Egun berean, Ipuztar Nafarrak eta Nabarralde elkarteek Ausa-Gazteluko eguna ospatuko dute. Ekitaldi honekin, 1200. urtean Gaztelak Euskal Herria zatitu zuela gogoratu nahi dute, Nafarroako erresumaren gaztelu bat egon zen tokian. Larraitzen egingo den topagunean, euskalnafarrei omenaldia egingo zaie, bai Gazteluan bertan, bai Larraitzen, Oroitplakaren aurrean. Bazkari batekin amaituko da ospakizuna.