Azpeitiko Udalak, Urolakoen Nafar Zuzterrak elkartearekin eta Deusto Unibertsitatearekin elkarlanean, bi ikastaro antolatu ditu Euskal Herriko historiari, literaturari eta arteari buruz. Ikastaro hauen helburua pertsonen ahalduntzea aktibatzea da, aldez aurreko prestakuntza akademikoa alde batera utziz, eta baita pertsona helduei prestakuntzarako eta aisialdirako guneak eskaintzea ere.
Antzinarotik gaur egunera arteko Euskal Herriaren historia ezagutu nahi dutenentzat, 'Euskal Herriko Historia' izeneko ikastaroa eskainiko da. Lau saio izango ditu, eta Beñi Agirre k (Nabarralde fundaziokoa) emango ditu saio nagusiak, gonbidatu batekin batera. Ikastaroa urriaren 13an, 20an, 27an eta azaroaren 3an izango da, astearteetan, 18:00etatik 20:00etara, Basazabal jauregian.
Ikastaro honetarako izena emateko epea urriaren 1a baino lehen amaituko da. Azpeitian erroldatuta daudenentzat prezioa 13,20 eurokoa da, eta ez daudenentzat, 16,40 eurokoa. Izena emateko, galdetegia bete eta ordainagiriarekin batera Hezkuntza zerbitzura bidali behar da, posta elektronikoz (hezkuntza@azpeitia.eus) edo aurrez aurre udaletxean.
Bestalde, 'Literatura, Artea eta Historia' ikastaroa ere eskainiko du udalak seigarren urtez, Deustuko Unibertsitatearekin elkarlanean. Ikastaro honek urriaren 5ean hasiko du urtea eta ekainera arte luzatuko da, astelehenero, 17:00etatik 19:00etara, Basazabal jauregian. Literatura, Artea eta Historia landuko dira, baina baita musika eta zinema ere, Deustuko Unibertsitateko irakasleek gidatuta.
Azken ikastaro honetarako izena emateko epea bihartik irailaren 25era bitartean egongo da zabalik. Azpeitian erroldatutakoek 40 euro ordaindu beharko dute ikastaro osoagatik, eta erroldatuta ez daudenek, 50 euro. Izena emateko, galdetegia bete eta Azpeitiko Udalaren Hezkuntza zerbitzura eraman behar da.
