Osakidetzak eta Osasun Sailak Guardiako osasun zentro berriaren eraikuntza proiektua esleitu dute. Hiru solairuko eta 1.580 metro koadroko azalera izango duen eraikin bat eraikiko da, La Barbacana gunean. Egungo espazioa sei aldiz handiagoa izango da, eta Guardia eta inguruko herrietako biztanleei osasun arreta eskainiko die.
Zentro berriak hainbat kontsulta izango ditu: 2 Medikuntza Familiarreko, 1 Medikuntza Interno/Erresidenteko (MIR), 3 Erizaintzako, 1 Pediatriako, 1 haurren erizaintzako, 1 edoskitze gela, 1 Odontologiako, 1 hortz-higienistaren kontsulta, 1 Optometriako eta 1 ateratze-gela, baita beste hainbat kontsulta eta erabilera anitzeko gela ere.
Osakidetzak aurreikusten du zentroa 2029an irekiko dela, 42 hilabeteko gauzatze-aldiaren ondoren eta 4 milioi euroko inbertsio osoarekin. Datozen hilabeteetan eraikuntza proiektua idatziko da; ondoren, obrak hasiko dira eta, azkenik, azpiegitura beharrezko ekipamenduz hornituko da martxan jartzeko.
Eraikin berria Guardiako Udalak La Barbacana gunean utzitako lursail batean kokatuko da. Diseinuan, herriko gune historikotik sartzeko erraztasuna emango duen oinezkoentzako sarbidea lehenetsi da. Proiektua JAAM arquitectos enpresa bilbotarrak egingo du, proiektu publikoetan espezializatua.
Zentro berriak zerbitzu berriak txertatzea ahalbidetuko du, hala nola pediatria, eta eremu horretako osasun-buruzagitzat, bere erreferentzia-eremuko udalerrieentzat odontologia, optometria edo fisioterapia bezalako espezialitateetan arreta eskainiko du. Gainera, profesionalen kopurua nabarmen handituko da, 15 profesional izatera iritsiz.
Azken urteotan, OSI Rioja Alavesa eremu horietako bat izan da Osakidetzaren azpiegituretan inbertsioak jasotzen. 2025ean Oiongo osasun zentro berria martxan jarri zen, ia 3 milioi euroko inbertsioarekin. Era berean, Lezako Ospitalea ere eraberritu da.
Eskualdeko Osasun Ituna betez, Osakidetzaren 2025-2032 Azpiegituren Programaren barruan sartzen dira jarduera guztiak, 1.600 milioi euroko inbertsioarekin eta 74 ekintza gauzatuz, teknologia modernizatuz eta asistentzia-sarea berrantolatuz Euskadi osoan.
