Bi erakundeek, Berdinsarea –Emakumeen aurkako Indarkeriaren eta Berdintasunaren aldeko Euskadiko Udalerrien Sarea– bitartez, tokiko jai parekideen laborategiaren bi saio antolatu dituzte. Saio horien helburua da Euskadiko udalerrietako langile teknikoen eta politikoen prestakuntza hobetzea.
Oraingo honetan, gizonen erantzukizuna eta inplikazioa izan dira ardatz nagusi. Gizonduz zerbitzuaren laguntzarekin, berdintasunaren aldeko gizon eta maskulinitateekin lan egiteko Euskal Zerbitzuak, bi tailer garatu dira. Tailer horietan, gizonek jai-espazioetan nola parte hartzen duten eta ingurune horietan eraso matxistak prebenitzeko duten zeregina aztertu da.
“"Gizonen inplikazioa funtsezkoa da berdintasunean aurrera egiteko, eta are gehiago tokiko jaien gai zehatzean, non aurrerapauso nabarmenak eman diren herri eta hiri gehienetan. Guztiok dugu jaietan espazio libre eta seguruak eraikitzeko ardura."
Tailerretan, Eudel erakundearen ordezkari gisa, Elburgoko alkateak ere parte hartu du. Bere ustez, udalerriek aukera dute praktika parekideagoak probatzeko, non pertsonek, gizon eta emakumeek, aniztasun osoan, espazio guztiak partekatzen dituzten eta jaietan elkarrekin bizitzeko eta gozatzeko aukera duten, baldintza berdinetan: ikusgarritasunean, dibertsioan eta parte-hartzean.
Gizonduz-eko prestatzaileak bi jardunaldiak zuzendu ditu, bata langile politikoentzat eta bestea berdintasuneko eta tokiko jaien antolaketan inplikazioa duten beste udal-eremuetako langile teknikoentzat. Maskulinitateei eta berdintasunari buruz hausnartzeaz gain, gizonak berdintasunaren lorpenetan eta indarkeria matxistaren aurka txertatzeko esku-hartze metodologiak ere landu dira, baita gizonek jai-espazioetan parte hartzeko egoera praktikoak ere.
