Ugao-Miraballes udalerriak argiteria publikoaren berritze lanak amaitu ditu Arandia gunean eta Leitokiko eskola gunerako oinezkoentzako bidean. Jarduketa honek 40.328 euroko inbertsioa izan du eta funtsezkoa izango da espazio horien energia-eraginkortasuna eta segurtasuna hobetzeko.

Ekaitz Mentxaka alkateak azpimarratu duenez, "honelako jarduketei esker gure iraunkortasunarekiko konpromisoan aurrera egiten dugu". Lan hauek instalazio horien energia-gastuak murriztuko dituzte, eta aurreikuspen teknikoen arabera, "urtean 12.000 kWh baino gehiagoko aurrezkia sortuko da".

Dauden argiak berritzeko, energia-eraginkortasun handiko LED teknologia duten luminaria berriekin ordezkatu dira argiztapen zaharrak. Honek argiztapen egokia eta egokitua bermatzen du Arandiako futbol zelaiari buelta ematen dion pasealekuaren hainbat puntutan eta Leitokiko eskolarekin lotzen duen Nerbioi ibaiaren ondoan.

Mentxakak gaineratu duenez, "Leitokirako sarbidean sei argi puntu berri gehitzeak segurtasuna eta erosotasuna areagotzen ditu, eta bereziki familia eta ikasle askok erabiltzen duten gune baten beharrizanari erantzuten dio".