EHUko Gipuzkoako Campuseko Liburutegi nagusian, hain zuzen ere Carlos Santamaría Zentroan, aurkeztu da Teknopolis zientzia, teknologia eta berrikuntzari buruzko programaren 29. denboraldia. Bertan izan ziren Amaia Esquisabel Alegria Eusko Jaurlaritzako Zientzia Politikarako zuzendaria, Agustin Ezenarro Zumeta ETBko Programa arloko burua, Edurne Gaston Estanga Elhuyarreko Zientzia Unitateko koordinatzailea eta saioa babesten duten erakundeetako ordezkariak.
Denboraldi berria asteburu honetan hasiko da, eta ordutegi zehatza izango du: larunbatetan 13:30ean ETB1en, eta igandeetan 12:15ean ETB2n.
Aurtengo denboraldiak garrantzi berezia emango die osasunaren inguruko gaiei. Medikuntzaren eta ikerkuntzaren ekarpen zientifikoaz gain, gaixotasunak zuzenean bizi dituzten pazienteen lekukotzak ere jasoko dira. Horrez gain, transplanteak egiteko teknika berritzaileak, minbiziaren aurkako tratamenduak eta elikaduraren joerak ere jorratuko dira.
Teknologiak ere leku nabarmena izango du programazioan. Lehen saioetan belaunaldi berriko robotikaz eta Euskal Herriko industria aeronautikoaz arituko dira. Gainera, klima-aldaketaren ondorioei erreparatuko die saioak, eta erakutsiko du nola eragingo dion itsas mailaren igoerak euskal kostaldeari eta gure hirien metabolismoari.
