Eusko Jaurlaritzako buruak Bilbao Metropoli 30 elkartearen Ezohiko Batzarrean parte hartu du gaur goizean. Topaketa honetan, elkarteak “Bilbao Metropolitano 2050” estrategia-hausnarketa prozesuaren ondorioak aurkeztu ditu, eta presidentetzaren erreleboa ofizialdu du.
Bere hitzaldian, Eusko Jaurlaritzako buruak Bilbao Metropoli 30 elkarteak Bilboren eta Euskadiren eraldaketari azken hamarkadetan egindako ekarpena nabarmendu du. Era berean, elkarteko kide bati eskerrak eman dizkio Bilbori eta Euskadiri eskainitako 35 urteko lanagatik, ametsak errealitate bihur daitezkeela erakusteagatik.
“"Lankidetzaren eta ausardiaren bidez, asmatu zenuten."
Horrela, gogora ekarri du duela hiru hamarkada, formulazioan sinplea baina eraldaketan iraultzailea zen ideia batekin, Bilbao Metropoli 30 elkarteak Bilbok “itsasadarrari berriro begiratu eta bere etorkizuna moldatzea” lortu zuela.
Gaur egun, Eusko Jaurlaritzako buruak adierazi duenez, Bilbao Metropoli 30 elkarteak defendatzen duen estrategia-hausnarketak koordenatu argiak ezartzen ditu: ekonomia lehiakorra, talentuaren aldeko apustua, iraunkortasuna, gizarte-kohesioa eta kultura demokratikoa.
“"Oinarri hauek eta haien Europako ikuspegia erabat partekatzen ditut. Bilboko metropoliak, Euskal Herriko gainerako metropoliekin konektatuta, bultzatu behar gaitu euskal metropoli handi konektatu bat osatzeko, gure Euskal Hiria, Atlantikoko Arkuaren erreferentzia urbano, ekonomiko eta kultural handia izateko gai eta behartuta dagoena, eta honek, aldi berean, Europaren sendotzearen protagonista izan behar du."
