Euskadik lehen aldiz hartuko du Estatuan Europako Osasun Publikoko 19. Konferentzia (EPH Conference), Europa mailako foro nagusia. Ostiralera arte, Bilboko Euskalduna Jauregiak 80 herrialde baino gehiagotako ia 2.800 profesional, ikertzaile eta erakunde bilduko ditu, biztanleriaren osasuna baldintzatzen duten erronka handien inguruan eztabaidatzeko.
Imanol Pradales Lehendakariak kongresuaren irekieran parte hartu du, Alberto Martínez Osasun sailburuarekin batera. Eusko Jaurlaritzaren osasun publikoarekiko, berrikuntzarekiko eta Europako lankidetzarekiko konpromisoa azpimarratu du bere presentziak.
“"Euskadi indartsu eta kohesionatu bat eraiki dugu. Baina aurrean ditugun erronek anbizioa bikoiztea eskatzen dute. Euskadik funtzionatzen jarraitu behar du, eta euskal herritarren osasuna hobetzea lehentasuna da euskal agendan, hau baita Jaurlaritzaren agenda bakarra."
Bilbo topagune honen egoitza izateko aukerak Euskadiren ibilbidea aitortzen du osasun publikoan, ikerketan, berrikuntzan eta lankidetza europarrean. Era berean, aukera paregabea da Eusko Jaurlaritzak eta Osasun Sailak osasun sistema bidezkoago, jasangarriago, erresilienteago eta etorkizuneko erronketarako prestatuago bat eraikitzeko egiten duten lana erakusteko.
Kongresuak Munduko Osasun Erakundeko, Europako erakundeetako, osasun publikoko sareetako, gizarte zientifikoetako eta erakunde espezializatuetako ordezkariak biltzen ditu. Ezagutza truke honek Euskadirentzat lankidetza zientifiko eta tekniko berriak sortzen lagunduko du.
Kongresuak klima-aldaketa, etxebizitza, hirien diseinua, desberdintasun sozialak eta lurraldekoak, eta landa-despopulazioa pertsonen osasunean nola eragiten duten aztertuko du, 'Sinergias urbanas y globales: dando forma al futuro de la salud pública mediante la resiliencia climática, la equidad y la innovación' lelopean.
