Kanpaina honek ospakizunetan sortutako hondakinak birziklatzea eta behar bezala kudeatzea sustatzen du. Horretarako, kartelak jarri dituzte metroan, lotura-autobus zerbitzuan, markesinetan, udal webgunean eta sare sozialetan.
Herriko Taldeak eta Mikelats elkarteekin elkarlanean, hondakinak modu antolatuagoan eta gaika biltzeko materialak eta edukiontziak jarriko dira, bereziki herri-bazkari nagusietan. Sukaldaritza-ekitaldietan, hondakinak gaika biltzeko edukiontziak egongo dira, azalpen-biniloekin identifikatuak, eta dekalogo bat banatuko da, hondakinak gaika biltzeko eta birziklatzeko jarraibideekin.
Sanfaustoetan zehar, informazio-karpa bat egongo da kuadrillen bazkarian, indaba-janean eta "Karparmartxo"an, non langile espezializatuak egongo baitira, hondakinak behar bezala kudeatzeko aholkularitza eta laguntza ematen.
Kanpainaren osagarri gisa, banbu-zuntzez eta birziklatutako plastikoz egindako 2.500 abaniko banatuko dira. Ekimen honek plastikozko hondakinak berrerabiltzea eta herritarrak ohitura jasangarriagoak hartzera kontzientziatzea bilatzen du.
Gainera, urriaren 16an, 19:00etan, Pedro López plazan, birziklatutako materialekin egindako musika-tresnen tailerra antolatu da. Parte hartzeko, aurretiaz eman beharko da izena, eta amaitutakoan, parte-hartzaileek beren instrumentuak etxera eraman ahalko dituzte.
