Basauriko Udala k Euskara Saria jarri du martxan, euskararen erabilera babestu, sustatu eta zabaltzeko lanean nabarmendu diren erakunde, elkarte eta norbanakoen lana aitortu eta ikusarazteko. Proposamenak aurkezteko epea azaroaren 3tik 20ra bitartean egongo da zabalik.
Saria jaso dezaketen hautagaiak Basaurin jaioak, bertan bizi direnak edota euren jarduera nagusia herrian dutenak izan behar dira, eta hiru kategoria ezberdinetan aurkeztu ahal izango dira: norbanakoak, irabazi-asmorik gabeko elkarteak (kirol edo kultur taldeak eta kolektiboak) eta entitateak (dendak, ostalaritza-establezimenduak, ikastetxeak, etab.). Norberak ezin izango du bere burua proposatu.
Proposamenak Basaurin erroldatutako edozein herritarrek, Basaurin erregistratutako edozein elkarte edo taldek, edota herriko euskaltegi eta ikastetxeek aurkez ditzakete. Epaimahai batek baloratuko ditu hautagaiak, euskararen alde egindako ibilbidea, herritarrengan eta bizitza sozialean izandako inpaktua, euskararen erabilera sustatu izana, euskara eremu berrietara zabaldu izana, euskal komunitatearentzat erreferente bihurtu izana eta euskara jatorri ezberdinetako pertsonei hurbiltzen ahalegindu izana.
Epaimahaiak hiru hautagai aurkeztuko ditu, eta horien artean erabakiko da saritua. Horren guztiaren berri abenduaren 3an egingo den ekitaldi publikoan emango da, "Euskararen Gala"n.
Proposamenak Internet bidez aurkez daitezke sede.basauri.eus/eu/euskararen-aldeko-saria helbidean, edota aurrez aurre Udaleko Herritarren Arreta Zerbitzuan (HAZ), Kareaga Goikoa 52 helbidean.
