Zumarragako Udalak ZuekinGAZTE bonuen kanpainaren bigarren edizioa aurkeztu du. Ekimenaren helburua da herriko merkataritzan eta Azokan kontsumoa sustatzea, gazteak bertako establezimenduetara hurbiltzea eta etorkizunean ere horietan erosteko ohitura indartzea. Helburu horiek Zumarragako 2030erako Hiri Ekonomia Jasangarriaren Plan Estrategikoan jasotako lan-ildoekin bat datoz.
Rosa Maiza Ekonomia Sustapeneko zinegotziak eta Iñaki Mendiluce Gazteriako zinegotziak aurkeztu dute kanpaina, 2025eko lehen edizioaren datuekin eta aurtengo xehetasunekin batera. Iazko kanpainan, 808 gaztek jaso zuten 30 euroko bonua, eta horietatik 737 erabili ziren, 21.330 euro zuzenean herriko establezimenduetara bideratuz. Egindako balantze ekonomikoaren arabera, 49.496 euroko eragin ekonomikoa kalkulatu zen.
Aurten, Udalak 30 euroko 1329 bonu jarriko ditu gazteen eskura, guztira 39.870 euroko aurrekontuarekin. Kanpaina baldintzak betetzen dituzten gazteen %70rengana iritsi ahal izango da, eta 30 saltoki eta zerbitzu-establezimenduk eta Azokako 2 postuk hartuko dute parte. Aurreikuspenen arabera, ekimenak 93.295 euroko jarduera ekonomikoa sor dezake herrian.
Rosa Maizak tokiko merkataritzaren egungo erronkei eta udalaren plan estrategikoari egin die erreferentzia: «Kontsumo-ohiturak aldatzen ari dira, eta herriko merkataritzak errealitate berrietara egokitu behar du. ZuekinGAZTEren bidez, gazteek Zumarragako saltokiek eta Azokak eskaintzen duten guztia ezagutzea eta eguneroko erosketetan ere kontuan hartzea nahi dugu».
Iñaki Mendiluce Gazteriako zinegotziak, berriz, gazteen parte-hartzearen garrantzia nabarmendu du: «30 euro horiek erosketa puntual bat baino gehiago izatea nahi dugu. Gazteek agian ezagutzen ez dituzten establezimenduak deskubritzeko eta etorkizunean ere bertan erosteko aukera ikusteko balio dezala kanpainak».
Bonuak azaroaren 5etik 7ra banatuko dira Piedad kaleko 16. zenbakiko kioskoan. 1991 eta 2008 artean jaiotako gazteek jaso ahal izango dituzte, betiere 2026ko urriaren 1a baino lehen Zumarragan erroldatuta badaude. Pertsona bakoitzak 30 euroko bonu bakarra eskuratu ahal izango du, izakinak agortu arte. Bonua 5 euroko bi zatitan eta 10 euroko beste bitan banatuta egongo da, eta azaroaren 5etik abenduaren 31ra erabili ahal izango da.
Establezimendu parte-hartzaileen zerrenda azaroaren 4tik aurrera egongo da eskuragarri www.zumarraga.eus webgunean eta Zumarraga Berrikusin.
