Legazpi ko Udalak, Eric Gálvez alkateak, Josu Galilea Kirol zinegotziak eta Mikel Salegi eta Andoni Etxaleku antolatzaileek aurkeztu zuten atzo Korosti Trail lasterketaren hirugarren edizioaren xehetasun nagusiak. Etxalekuk adierazi zuenez, lasterketa urriaren 18an izango da, iazko ibilbide eta distantzia berdinekin, baina ordutegian aldaketa txiki bat eginez: proba luzea (23,4 km) 9:30ean hasiko da eta laburra (13,4 km) 10:15ean.
Guztira 446 parte-hartzaile izango dira, horietatik 125 emakumezkoak. Parte hartze lokal nabarmena da, 189 legazpiar baitira izena eman dutenak. Antolakuntzatik adierazi dutenez, "profil oso desberdinak ikusten dira zerrendetan eta oso pozik gaude". Gainera, 80-90 boluntario inguruk lagunduko dute ekitaldi egunean.
Aurten, konpromiso sozial eta ekologiko sendoa izango du lasterketak. Ingurumenarekiko errespetua bermatzeko, Etiketa Berdea erakundearekin elkarlanean arituko dira jasangarritasunaren alde. Horrez gain, Goierri Ligako proba puntuablea denez, izen-emate bakoitzeko euro bat Gipuzkoako Minbiziaren Aurkako Elkarteari bideratuko zaio.
Korosti Trail Txiki berrikuntza nagusia izango da, urriaren 17an, larunbatean, ospatuko dena 4 eta 14 urte bitarteko haurrentzat eta gazteentzat. Distantziak adinaren arabera egokituko dira, eta 17:00etatik aurrera izango da Euskal Herria plazan. Antolatzaileek herritar guztiak animatu dituzte giro festiboaz eta mendi-giroaz gozatzera.
“"Esan dezakegu hirugarren edizio honetan lasterketa hau legazpiarrena bihurtu dela eta geurea sentitzen dugula."
Antolakuntzatik, Udalari eta tokiko merkataritza zein zerbitzuei eskerrak eman dizkiete lehen egunetik emandako babesagatik. Gainera, festa giroa sustatzeko, puzgarriak, talogileak eta tokiko merkataritzarekin elkarlanean egindako zozketa bat egongo dira.
