Ordiziako Udalak merkataritza lokala eta udalerriko jarduera ekonomikoa bultzatzeko helburuarekin jarri du martxan aurten ere Ordizia Zabalik laguntza programa. Aurten, 42.000 euro bideratuko ditu, hutsik dauden lokalak berreskuratzen laguntzeko, belaunaldi erreleboa errazteko eta ekintzaile proiektu berriak sustatzeko.
Maitane Álvarez alkateordeak nabarmendu duenez, "helburua da ekintzaileen bidez merkataritza-lokal hutsak berreskuratzea eta txikizkako merkataritzan belaunaldi-erreleboari erantzutea. Urtero proiektu ekintzaile berriak sortzen direla ikustea pozgarria da".
Hau izango da laguntza programaren hamabigarren edizioa. Azken urteetan, 70 ekintzaile baino gehiago sartu dira programan, eta %75eko jarraipen-tasa du. Urteko deialdia izan arren, programa bikoitza denez, aurten ere programan jarraituko dute aurreko urteetan laguntza jaso zuten hainbat establezimenduk, hala nola Serendipity Moda, TK Pilates, Garage Project, MAE Estética, Goxo-Goxo Cafetería, IMZ Moda eta Kiska Taberna. Gainera, 15 establezimendu inguru atxikiko direla aurreikusten dute. Eskaerak aurkezteko epea ekainaren 30ean amaituko da.
Ekintzaileek jasotzen dituzten laguntza ekonomikoak alokairua ordaintzera edo lokalak erostera bideratuta daude. Alokairuaren kasuan, Udalak hileko kostuaren %40 finantzatuko du, gehienez 300 euro hilean, gehienez bi urtez eta 2026ko urtarriletik aurrera atzeraeraginez. Bestalde, lokal bat erostea aukeratzen dutenek balio katastralaren %4ko laguntza jaso ahal izango dute, gehienez 3.000 euro.
Álvarezek azpimarratu duenez, "Ordiziako merkataritza-dentsitatea bereziki esanguratsua da. 10.000 biztanle inguruko udalerri batean, ia 200 establezimendu ditugu, eta Udalaren helburua da sektorearen lehiakortasuna indartzen jarraitzea eta tokiko sare ekonomikoa osatzen duten saltoki, zerbitzu-enpresa eta ostalaritza-establezimenduen jarraipena bermatzea".
