Loinatz Udal Musika Eskolak datorren ikasturterako matrikulazio epea zabaldu du, maiatzaren 17ra arte. Interesdunek eskaerak eskolaren webgunearen bidez egin ditzakete, beasaingomusikaeskola.eus helbidean.
Eskaintza ezagutarazteko, ate irekien jardunaldia egingo da maiatzaren 5ean, 17:00etatik 19:30era, Musika Eskolan bertan. Bertaratzen direnek musika tresnak, irakasleak eta zentroaren funtzionamendua ezagutzeko aukera izango dute. Jardunaldiaren amaieran, 19:00etan, Folk taldeak girotutako luntxa eskainiko da Batzar Aretoan.
“"Musika ikasteak dituen onurak gizarteratzea eta instrumentu bat jotzeko edo talde batean kantatzeko gogoa duten horiei bultzada ematea da gure helburua."
Matrikulazio epearekin batera, 'Musika Garaia' egitarau kulturala antolatu da, maiatzean zehar hainbat ekitaldi eskainiz. Horien artean, maiatzaren 7an Marta Nietorekin musikoterapiari buruzko hitzaldia izango da Batzar Aretoan, eta maiatzaren 8an 'Musika Plazara' kontzertua Gernika pasealekuko frontoian.
Gainera, maiatzaren 10ean Igartza Musika zikloaren barruan, Haizea Martiartu Quartet taldearen kontzertua eskainiko da Igartzako Jauregian. Maiatzaren 14an 'Musika Kalean' emanaldia izango da Bideluze plazan, eta egitarauari amaiera emateko, maiatzaren 31n Usurbe Antzokian Feten Feten Sinfonikoa ikuskizuna ikusi ahal izango da, 6 euroko sarrerarekin.
