Aurreko zapatuan, Aian, Leintz taldeak jantzi zuen Gipuzkoako Herriarteko Bertso Txapelketako txapela. Haizea Arana, Oihana Arana eta Ane Zuazubiskar bertsolariek, Olatz Zuazubiskar gai-jartzaileak eta Larraitz Trojaola epaileak osatutako taldeak Zumarraga-Urretxu 1 taldeari irabazi zion finalean.
Leintz taldeko kideek bost saio jokatu dituzte guztira txapelketa honetan. Haizea Aranaren esanetan, balorazio positiboa egiten du egindako lanarekin: "Herriarteko Txapelketa oso ondo joan da. Debagoienean jokatu ziren faseak oso politak izan ziren. Finala izan da Deba bailaratik kanpo kantatu dugun saio bakarra, eta oso pozik gaude emaitzarekin."
Larraitz Trojaolak, epaile lanetan aritu zenak, harriduraz azaldu du ez zuela espero bertsolari izan gabe txapel bat irabaztea: "Oso ondo joan da, eta oso pozik gaude. Txapela etxean izanda, kontrakorik ezin dugu esan. Gainera, nork esango zuen bertsolari izan gabe, zalea soilik izanda, etxean txapel batekin amaituko nuela."
Txapelketak aspaldian sakabanatuta zegoen bertsogintza saretzeko balio izan duela adierazi dute Leintzeko bi kideek. "Lau saio izan dira gure bailaran, eta helduen bertso eskolak saretzeko aitzakia ederra izan da, eta nahiko giro polita dugu gure artean. Hori, horrenbeste denboraren ostean, pozgarria izan da", dio Aranaren arabera. Trojaolak gaineratu du formatuak berak ahalbidetu duela hori, eskualde bakoitzaren esku uzten baita lehen fasearen antolakuntza.
Aranaren iritziz, eskualdea aspaldi kokatu zen Gipuzkoako bertsolaritzaren mapan, baina txapelketak balio izan du Debagoiainak mapa horretan bere lekua bermatzeko. "Debagoiena gure aurretik kokatu zuten bertsoaren mapan, eta hori ezin dugu ukatu. Egia da hori urte askoan egon dela pixka bat geldi, eta nik uste dut polita izan dela, alde batetik, Debagoienaren ibilbide horri omenaldi txiki bat egiteko eta, bestetik, berriro ere bagatozela esateko", azaldu du.
Trojaolak bat etorri da Aranarekin, baina azpimarratu du herriartekoak Debagoienean bertsotan ondo egiten dela frogatzeko balio izan duela: "Batzuk aspalditik genuen Debagoiena bertsolaritzako mapan kokatuta, baina uste dut balio izan duela, bereziki Gipuzkoan, batzuk Debagoienan bertsotan egiten dela eta gainera ondo egiten dela konturatzeko."
