Legazpi k Kubarekiko elkartasun keinuz betetako kanpaina abiatu du, eta dagoeneko 5.600 euro bildu ditu Habanako William Soler ospitale pediatrikoa laguntzeko. Herritarrek antolatutako ekimen honek, AEBko Gobernuak ezarritako blokeo ekonomikoaren ondorioz pairatzen ari diren zailtasunak arintzea du helburu, bereziki osasun sistemarentzat erronka handia den elektrizitate faltari aurre egiteko.
Legazpitik Argia Kubari izenburupean, hainbat legazpiarrek bat egin dute ekimenarekin. Euskadi-Kubarekin elkartearekin elkarlanean, eguzki-energia fotovoltaikoa sortuko duten bi ekipo handi erosi eta instalatuko dira ospitalean. Kanpainaren erantzun solidarioa "oso garrantzitsua" izan dela nabarmendu dute arduradunek, eta eskerrak eman dizkiete Legazpiko pertsona, denda, taberna eta erakunde guztiei.
Diru gehiago biltzeko eta Kubaren egoera ezagutzera emateko, datozen egunetarako hainbat ekintza antolatu dira. Gaur bertan, Hotz Legazpi elkarteak pintxo solidarioak salduko ditu Kale Nagusian, Ilintik antolatutako Udafest jaiaren barruan. Bertan, herriko idazleek ere parte hartuko dute liburuak banatuz.
Datozen egunetan, uztailaren 16an, elkarretaratzea deitu da Kale Nagusian (Rural Kutxaren bulegoaren aurrean), Kubako herriari elkartasuna adierazteko eta blokeoa salatzeko. Ondoren, uztailaren 25ean, jaialdi solidario bat ospatuko da Nafarroa kalean, musika emanaldiak eta Kubako janari eta edariekin.
