Lazkaoko Udalak jakinarazi duenez, San Jose auzoko igogailu publiko berria datozen asteetan jarriko da martxan. 19. eta 21. etxebizitza-blokeen artean kokatuta dago, udal titulartasuneko lursail batean, eta lau metro inguruko desnibela gaindituko du, auzoko irisgarritasuna hobetuz.
Lanak ia amaituta daude eta une honetan Iberdrolarekin egin beharreko izapideak egiten ari dira. Oniritziak jaso ondoren, igogailua herritarren erabilerarako prest egongo da. Jarduketa honen barruan, igogailua instalatu, kristalezko estalkia jarri eta ingurua egokitu da, hiri-ingurunean txertatuz eta auzotarren eguneroko joan-etorrietarako aukera erosoagoa eskainiz.
Azpiegitura berria bereziki lagungarria izango da mugitzeko zailtasunak dituztenentzat, baita haur-kotxeekin, erosketa-orgekin edo eskaileretan garraiatzeko zailak diren bestelako elementuekin ibiltzen direnentzat ere. Horrela, oztopo arkitektonikoak kentzen eta auzoa pertsona guztientzat irisgarriagoa, erosoagoa eta seguruagoa egiten lagunduko du.
Lanen esleipenduna Construcciones M.B. Antio S.L.L. enpresa izan da, 166.542,76 euroko (BEZik gabe) zenbatekoan. Igogailu berriarekin, San Jose auzoko irisgarritasuna hobetuko da eta bizilagunen eguneroko joan-etorriak erraztuko.
