Mugikortasun, Turismo eta Lurralde Antolaketa Sailak GO07 lineari, Urola Garaia eta Goierri Donostiarekin lotzen dituena, bi joaneko eta bi itzulerako espedizio berri gehituko dizkio Legazpiraino, astelehenetik ostiralera. Neurri honek udalerri honen eta Donostiaren arteko konektibitatea hobetuko du.
Azahara Domínguez diputatuak eta Legazpiko Garapen Iraunkor, Energia Trantsizio eta Garraio zinegotziak, Óscar Valbuenak, azaldu dutenez, linearen erabileraren datuak eta legazpiarrek hura erabiltzeko egiten dituzten transborduak aztertu ondoren, lau espedizio berri gehitzea erabaki da, udalerri honetan jatorria edo helmuga izango dutenak.
Zehazki, Zumarragatik egunero 10:15ean eta 12:15ean ateratzen diren autobusek, ekainaren 1etik aurrera, Legazpitik aterako dira 10:05ean eta 12:05ean. Bestalde, Donostiatik 16:45ean eta 17:45ean ateratzen direnek Legazpiraino luzatuko dute ibilbidea. Zerbitzu hauek iazko maiatzean martxan jarritakoekin bat egingo dute: astelehenetik ostiralera, 06:05ean eta 07:05ean Donostiarantz, eta 20:45ean eta 21:45ean Donostiako hiriburutik ateratzen direnak; eta larunbatetan, igandeetan eta jaiegunetan, 08:05ean Legazpitik eta 22:45ean Donostiatik.
Diputatuak zehaztu duenez, azken urteko erabilera datuen azterketak ondorioztatzen du ordu horietan gertatzen dela transbordo gehien, eta horregatik erabaki da ordu horietan autobusa Legazpitik irten edo bertara iristea. Guztira, astelehenetik ostiralera, zortzi konexio zuzen izango dira Legazpirekin, lau goizean joateko eta lau arratsaldean itzultzeko.
Bestalde, diputatuak azaldu du Legazpiko herritarren GO07rako sarbidea errazten jarraitzeko, bere sailak DG09 linearen (Legazpi-Zumarraga (Ospitalea)) ordutegiak egokituko dituela, "pertsona guztiak garaiz iristea bermatzeko" bi lineen artean Zumarragako geltoki intermodalean. DG09 lineak Legazpiko hainbat puntutan egiten ditu geldialdiak, eta horri esker, adinekoek, ikasleek eta langileek errazago izango dute GO07ra sartzea beren etxetik gertuago dagoen puntu batetik, industrialderaino joan beharrik izan gabe.
Gogorarazi behar da DG04 (Arrasate-Oñati-Legazpi-Zumarraga) linearekin transborduak egitea posible izaten jarraituko dela.
Óscar Valbuena zinegotziak "oso positibotzat" jo ditu neurri hauek, eta azpimarratu du "urrats berri bat dela Legazpiko herritarren eta Donostiaren arteko konektibitatea hobetzen jarraitzeko eta gero eta erosoagoak, eraginkorragoak eta jasangarriagoak diren mugikortasun alternatibak errazteko". Bere hitzetan, "aldaketa hauen esker, Legazpiko bizilagun gehiagok garraio publikoko zerbitzu zuzenagoa eta eguneroko beharretara egokitua izango dute".
Foru arduradunak erakundeen arteko lankidetza eta entzute aktiboa balioetsi ditu Lurraldebus hobetzen jarraitzeko: "Herritarrei entzuten diegu eta datuak aztertzen ditugu zerbitzua hobetzeko aukerak hautematen ditugun lekuetan egokitzeko, gipuzkoarren benetako beharrei erantzunez, pertsona guztiek bizitza garatzeko aukera berberak izan ditzaten, ibilgailu pribaturik izan edo hirugarren pertsonengan dependitu beharrik gabe, betiere zorrotz eta planifikatuta".
Halaber, diputatuak nabarmendu du sailaren helburua dela garraio publikoa gero eta lehiakorragoa izatea ibilgailu pribatuaren aldean. "Sartzen dugun hobekuntza bakoitzak garraio publikorako sarbidea demokratizatzea bilatzen du, herritarren eguneroko bizitza errazteko eta, horrela, lurralde jasangarriagoa eta kohesionatuagoa izateaz gain, berdintasunezkoagoa ere lortzeko. Entzuten, aztertzen eta zerbitzuak egokitzen jarraituko dugu erabiltzaileen eskaerei hobeto erantzuteko eta horrela garraio publiko erabilgarria, eraginkorra eta gero eta hurbilagoa bermatuz".
Azkenik, diputatuak azpimarratu du bere sailak erabiltzaileen datuak aztertzen jarraituko duela, Lurraldebusen gainerako lineekin egiten duen bezala, "dauden eskaerei egokitzeko zerbitzua ematen duguna".
Ordutegiak Lurraldebusen webgunean edo erabiltzailearen arreta telefonoan kontsultatu ahal izango dira: 900 300 340.
