Alegiako Udalak, Intxausti familiaren laguntzarekin, Ricardo eta German Intxaustiren argazki ondarea iraunkortzeko urtea antolatu du. Bi argazkilari hauek Tolosaldeko eta Goierriko herriak eta pertsonak jaso zituzten beren lanetan, 1913tik 2003ra bitartean. Familiarekin elkarlanean, ondarea Gipuzkoako Foru Aldundiaren esku utzi dute, eta haien lana omentzeko ekitaldiak antolatuko dira urte osoan zehar.
Ekimenaren aurkezpenean parte hartu zuten Rikardo Intxaustik, argazkilarien ondorengoak; Regina Sorarrain Alegiako alkateak; Mikel Prieto ikerlariak; Ramon Martin Sukia Gipuzkoako Foru Aldundiko artxiboen zerbitzuburuak; eta Jose Valderrey argazkigintzan adituak. Rikardo Intxaustik ia 200.000 argazki negatibo inguruko bilduma, argazki kamerak eta errebelatzeko materiala dohaintzan eman ditu, eta aitortu du «pisua kendu» diola gainetik.
Urtea hainbat ekitaldirekin ospatuko da. Lehenengoa, uztailaren 12an, German Intxaustiren omenezko txistularien alardea izango da, berak konposatutako piezak joz. Udazkenerako, berriz, erakusketa bat eta hainbat hitzaldi antolatuko dira, intxaustitarren lana eta ondarea ezagutarazteko. Sorarrain alkateak azpimarratu duenez, «familia honek merezi duen eskertzea eta aitortza» egitea da helburua.
Mikel Prieto ikerlariak bildumaren balio berezia nabarmendu du, barnealdeko herrien eguneroko irudiak jasotzen dituelako, aberats zein pobreenak. Gainera, argazki karrete guztien indizeak osatu izanak balio historiko eta pertsonala ematen dio bildumari. Jose Valderrey adituak XX. mendeko argazkigintzaren laburpen bat dela adierazi du, eta konposizio aldetik ere argazkilari handien parekoak direla goraipatu du.
Gipuzkoako Foru Aldundiak, Ramon Martin Sukiaren esanetan, «lehen pausoa» eman du materiala lantzeko, baina «herritarren laguntza beharko dute aurrera jarraitzeko». Adimen artifizialaren laguntzaz, argazkien indize guztiak digitalizatu dituzte, eta laster kontsultatu ahal izango dira, irudi interesgarrienak hautatu eta digitalizatzeko. Interesatuek Tolosako Gipuzkoako Artxibo Orokorrean izango dituzte eskuragarri indizeak.
Albizturko, Altzoko eta Amezketako alkateek ere parte hartu dute aurkezpenean, eta eskerrak eman dizkiete familiari eta adituei ondarea herritarren eskura jartzeagatik. Albizturren eta Amezketan, herritarrak identifikatzeko egitasmoak abian jarri dituzte dagoeneko, eta Altzoko alkateak nabarmendu du adineko herritarren prestutasuna laguntzeko.
