Euria azken unean agertu bazen ere, Olamendi eskolak antolatutako elkartasun azoka arrakastatsua izan zen joan den ostiral arratsaldean. Ekimen honen helburua Palestinaren alde dirua biltzea zen. Eskola publikoko ikasleek, irakasleek eta familiek hainbat postu jarri zituzten plazan, gozoak, jostailuak eta liburuak salduz. Gainera, produktu ugariz osatutako saski bat ere zozkatu zuten.

Oraindik ez da bildutako diru kopurua zehaztu, baina antolatzaileak oso pozik agertu dira herritarren erantzunarekin. Behin kontuak eginda, lortutako dirua Paz con Dignidad elkarteari emango zaio, eta honek, aldi berean, Al Awda elkarteari bideratuko dio laguntza, Palestinan erabili dezan.

Azoka solidario hau hainbat elkarteekin elkarlanean antolatu zen: Buskabaso, Beti Gazte, Lekanazpi, Hotz Legazpi eta Auzoak Bizirik. Elkarte hauek herrian arropa premia dutenen aldeko bilketa ere egin zuten, eta haien balorazioa ere oso positiboa izan da.