Museoak, urtero Euskal Herri osoko milaka bisitari erakartzen dituenak, etengabe lan egiten du bere edukiak berritzeko eta hobetzeko. Aurkezpen ekitaldian, museoko arduradunek ikaskuntza digitala eta abentura uztartzen dituen egitasmo berri bat, Museoen Egunaren inguruko ekitaldiak eta azaroko Mineralogia eta Paleontologia Asteko erakusketa monografikoaren xehetasunak eman zituzten.
Jolas digital berria, Bizi Urrelur abentura! izenekoa, Urretxu.eus webgunean dago eskuragarri, eta bereziki Lehen Hezkuntzako ikasleei zuzenduta dago, baina publiko orokorrarentzat ere erakargarria da. Helburua da museoa bisitatu aurretik eta ondoren ikaskuntza sakontzeko baliabide pedagogiko berriak eskaintzea, jakin-mina piztuz eta museora joateko animatuz. Urretxuko Udalak komunikazio kanpaina bat egingo du ikasturte hasieran eduki digital berriak ezagutzera emateko.
“"Azken urteetako esperientziak erakutsi du bisitari askok ez dutela garbi zer museotara doazen edo non dauden. Horregatik, aurkezten den proposamenak museoa lehenagotik ezagutzeko ateak ireki nahi ditu."
Maiatzaren 21ean, 17:00etatik 19:00etara, zientzia saioak egingo dira Museoen Egunaren harira, 6 eta 12 urte bitarteko haurrentzat. Saio horietan, emakume zientzialariek kimikaren arloan egindako ekarpenak nabarmenduko dira, esperimentu praktiko eta dibertigarrien bidez. Parte-hartzaileek hiru saiotan hartuko dute parte: hare mugikorra, sua eskuan eta elur artifiziala. Izen-ematea bihar irekiko da urrelur@urretxu.eus helbide elektronikoaren bidez.
Horrez gain, Mineralogia eta Paleontologia txangoa antolatu da Burgosko Lorara eta Merindadeetara, hilaren 16an. Txango honetarako plaza guztiak bete dira, 38 lagunek parte hartuko dutelarik. Udazkeneko Mineralogia eta Paleontologia Asteko erakusketa monografikoaren protagonista nagusia burdina izango dela aurreratu dute, burdinarekin eta egurrarekin lan egiten duten artisten lanak erakutsiz.
