Urretxu ko Pagoeta zentro Soziokulturalean hitzaldi bat eta argazki-erakusketa bat izango dira ostegunean, 18:00etan, 'sexilioa' izeneko gaiaren inguruan. Ekimen hau Urretxuko Udaleko Aniztasun eta Bizikidetza sailak antolatu du, eta bertan, Euskal Herriko landa eremuetako bost pertsona 'queer'en esperientziak, gogoetak eta sentsazioak jasotzen dituen fotokazetaritza proiektu bat aurkeztuko da. 'Queer' deitzen zaie heteroxualeak ez diren eta gizonezko zein emakumezkoen rol tradizionaletatik at identifikatzen diren pertsonei.

Aniztasun eta Bizikidetza sailetik adierazi dutenez, "'Xerka'k LGTBIQ+ komunitatearen isiltasuneko exilio prozesua jorratzen du herrietan". Ekitaldian, Martxel Larraza eta Joseba Olagarai kazetariek emango dute hitzaldia, eta haiekin batera, gaiari buruzko argazki-erakusketa bat ikusi ahal izango da Pagoetako kulturunean bertan.

Hitzaldia euskaraz izango da, eta lurralde, jatorri eta adin desberdinetako bost pertsona 'queer' disidenteren identitateak eta bizi-esperientziak ezagutaraziko ditu. "Ekimenaren helburua mezu positibo bat helaraztea da: Euskal Herriko landa eremuan posible dela 'queer' izatea eta herrian bizitzea, euskaraz", azaldu dute. 'Sexilioa' hitzak, berriz, LGTBIQ+ pertsonen derrigorrezko migrazioa izendatzen du, pairatutako zapalkuntzaren ondorioz beren ingurune familiar eta sozialetik hiriguneetara ihes egiten dutenak.

'Xerka' proiektua Martxel Larraza k 2023an egindako fotokazetaritza lanetik sortu zen, eta 2024ko III. Berria komunikazio lehiaketan saria jaso zuen. "Lan honek paisaiaren eta erretrataren genero klasikoak uztartzen ditu, teknika eta estilo fotografiko desberdinak erabiliz. Argazkiek subjektuaren eta ingurunearen arteko dialektika poetiko bat proposatzen dute, hain gatazkatsua izan daitekeen harreman baten inguruan", aurreratu dute Pagoetan izango den proiektuaren inguruan.