Lehen Hezkuntzako ikasleen artean bizi ohitura osasungarriak sustatzea, elikadura zaindu eta tokiko nekazaritzaren nahiz azokaren balioa belaunaldi berriei transmititzea da ekimenaren helburu nagusia. Aurten, ikasleek egindako marrazkiekin diseinatutako poltsa berrerabilgarriak banatuko dituzte ekoizleek urriaren 13tik aurrera azoketan.
Egitasmoak, laugarren urtez jarraian abian jarri den honek, tailer teoriko-praktikoak, herriko zein eskualdeko ekoizleei bisitak eta azokako ekintzak uztartuko ditu ikasturte osoan zehar. Aurkezpenean izan ziren Leire Artola Beasaingo Alkatea, Rosa Aurkia Udaleko ingurumen teknikaria, Osakidetzako Elena Calvillo Arteaga eta Maite Arrospide Arrospide, azokako ekoizlea Josetxo Mendia, eta herriko ikastetxeetako ordezkariak.
Beasaingo Alkateak, Leire Artola k, proiektuaren jarraikortasunaren garrantzia nabarmendu zuen, "ez dugu soilik osasunaz hitz egiten; gure sustraiez, gure lurraz eta tokiko ekoizleen lanaz ere ari gara zentzu zabalean". Ingurumen teknikariak, Rosa Aurkia k, gaineratu zuen "hezkuntza eta ingurumena eskutik doaz ekimen honetan" eta ikasleek elikagaiak nondik datozen eta bertako produktua kontsumitzeak duen eragina ikasi behar dutela.
Osakidetzako Elena Calvillo Arteaga eta Maite Arrospide Arrospide profesionalek azaldu zuten tailerren helburua dela LH6ko haurrengan elikadura osasungarria sustatzea eta komunitateko beste eragileekin sarean lan egitea. Tailerrak, bi orduko saioak, elikaduraren alderdi psikologikoa, plater osasungarriaren metodoa, produktuen etiketak irakurtzea eta gorputz-aniztasuna lantzen dituzte, eta amaieran hurbileko produktuekin gosari osasungarri bat egiten dute.
Josetxo Mendia barazki ekoizleak (Altzibar baserria, Zegama) funtsezkotzat jo zuen ikasleek baserrietara eta baratzeetara hurbiltzea, lurra lantzen eta elikagaiak hazten ikusteko. Ikasleek lau bisita egingo dituzte: Artzabaltza baserria (ogi ekologikoa), Gipuzkoako Erlezain Elkartea (erlearen mundua), Oñatibi Txiki baserria (sagar-mundua) eta Altzibar baserria (barazki ekologikoak).
Udaberrian, ikasleek azokara joango dira NBEren Garapen Jasangarrirako Helburuak lantzeko, eta maiatzean eta ekainean LH5eko ikasleek ere azokara hurbilduko dira hurrengo ikasturterako prestakuntza moduan. Beasaingo Udalak erosketarako deskontu-bonuak aterako ditu tokiko eta garaiko produktuen erosketa sustatzeko, LH4ko ikasleen diseinuekin.
