Aurrekontu proposamen honek, legealdiko kudeaketa-planari jarraipena emanez, etxebizitza duina, pertsonen ongizatea eta zaintza-ekosistema, irisgarritasun unibertsala, jasangarritasun ekologikoa eta formazioari zein tokiko merkataritzari lotutako enplegua lehenesten ditu. Aurrekontua iazkoarekin alderatuta ia 1,5 milioi euro handitu da, %6,3 igoz, kudeaketa zuhurrari eta zorrik ezari eutsiz.
Etxebizitza publikoa eta birgaitzea sustatzeko, 150.000 euro gehituko zaizkio alokairuko etxebizitza publikoentzako lurzoruak erosteko aurreikusitako 400.000 euroko kopuruari. Gainera, 252 etxebizitza hutsak merkatura ateratzeko pizgarriek jarraipena izango dute, eta gazteen emantzipaziorako laguntzak mantenduko dira (18-35 urtekoentzat, 100-250 euro/hilean). Eraikinen isolamendurako eta galdara zein leiho efizienteagoak jartzeko dirulaguntzak ere indartuko dira.
Zaintza eta gizarte-ongizatea ardatz hartuta, Tokiko Zaintza Mahaiak zuzeneko esku-hartzeak garatuko ditu 2027an. Etxez etxeko laguntza zerbitzuak 1,4 milioi euroko diru-lerroa izango du, eta Oriako pasealekuko pisu tutelatuak Etxe Lagun proiektuaren bidez eredu berrira igaroko dira, elkarrekiko zaintzan eta autonomian oinarrituta.
Gazteria eta hezkuntza arloan, Udalak lehen aldiz antolatuko ditu Udaleku Irekiak (160.000 euro), eta Gaztelekua dinamizatzeko 155.000 euroko aurrekontua izango da. STEAM zientzia eta teknologia programak DBHra zabalduko dira, nerabeentzako bi talde berri sortuz.
Irisgarritasuna eta mugikortasuna hobetzeko, Mateo Mujika eta Arantzazu kaleen arteko igogailurako 500.000 euro bideratuko dira. Maria Arana parkea ere eraberrituko da igogailu berri batekin, eta Ugartemendin aparkaleku berri bat sortuko da 700.000 euroko inbertsioarekin, Txindoki Institutuko eta Senpereko merkataritza-gunearen inguruko presioa arinduz.
Klima-aldaketa, energia eta landa-ingurunea ere jaso ditu aurrekontuak. Udal-eraikinetan (liburutegia, udaletxea, Musika Eskola) aerotermia eta plaka fotovoltaikoak ezarriko dira, eta kale-argiteria LED teknologiarako igaroko da (230.000 euro). Baserri-bide publikoen mantentze-partida bikoitza baino gehiago handituko da (180.000 eurora), eta Auzo Taxi zerbitzua eguneratu egingo da.
Ekonomia zirkularra, merkataritza eta banaketa jasangarria bultzatzeko, Goieki agentziarekin formazio eta enplegu laguntzei eutsiko zaie. Tori! zerbitzuak jarraipena izango du (54.200 euro/urtean), eta Zero Hondakin – Rexcatering proiektuak bigarren vending-makina bat izango du eskola-jantokietako eta enpresetako soberakinak aprobetxatzeko.
Aurrekontu proiektua oposizioko taldeei aurkeztu zaie ekarpenak jasotzeko, eta abenduaren 17an Udalbatzan onartuko da behin betiko.
