Asteko janaria bi orduan prestatzea, modu errazean, osasuntsuan eta jasangarrian, ideia erakargarria da baina askorentzat ezinezkoa dirudi. Gipuzkoako Azoken Sareak eta Zumarragako Udalak sustatutako 'Azokatik Mahaira' sukaldaritza eta nutrizio tailerrak hori lortzeko tresnak eskainiko ditu. Jarduera doakoa izango da eta datorren larunbatean, maiatzaren 30ean, 11:00etan hasiko da, Zumarragako plazan. Bertan prestatutako platerak dastatzeko aukera ere izango da.

«Sukaldaritzan denbora optimizatzeko modua erakutsiko da, aldi berean dieta orekatua eta osasuntsua bermatuz. Horretarako, bertako eta sasoiko produktuak erabiliko dira, tokiko ekoizleen lana balioan jarriz eta kontsumo arduratsua sustatuz», adierazi dute Gipuzkoako Azoken Saretik.

Saioa Anne Otegi sukaldariak eta Aitziber Aizpuru nutrizionistak gidatuko dute, sukaldaritzaren eta elikaduraren ikuspegi osagarriak uztartuz. Haien eskutik, parte-hartzaileek egunerokoan aplikatzeko aholku praktikoak eta errezeta jasoko dituzte. «Tailerrak aukera paregabea emango du elikadura ohiturak hobetzeko, denbora aurrezteko eta inguruko produktuen balioa ezagutzeko», iragarri dute.

Ekimen hau Landaolak, Gipuzkoako Landa Garapenerako Elkarteen Federazioak antolatu du, Zumarragako Udalaren laguntzarekin, landa garapena eta tokiko ekonomia sustatzeko helburuarekin. Azoken Sareko kide da udala.

Nekazaritza merkatuen biziberritzea da tokiko merkatu guztien helburua, eta proiektu honekin horretan lagundu nahi da. Horrela, saio honetan, sasoiko produktuak kontuan hartuta, etxean azkar eta eroso prestatzeko moduko errezetak zuzenean ikasi ahal izango da, eguneroko ohiko plateretatik aldenduz eta tokiko elikagaiak modu erakargarriagoan prestatuz.

Osasuntsu jatearen garrantzia ere nabarmendu nahi da, eta elikagai bakoitzaren abantaila nutrizionalak ezagutzeaz gain, modu osasuntsuan elikatzeko modua ikasteko aukera izango da.