Eusebio Gurrutxaga plazaren ondoan dagoen lorategi berria atzo ireki zen ofizialki, nahiz eta herritarrek jada erabiltzen zuten. Ekitaldian, Iñaki Ostolaza alkateak azaldu zuen lorategia "herritarren eskura" jartzea zela helburua. Lanek 328.930 euroko aurrekontua izan zuten, eta Europar Batasunaren Next Generation funtsen bidez finantzatu dira neurri handi batean.

Ostolazak azpimarratu zuen lorategi hau ez dela turismoari lotutako proiektu bat, baizik eta "zumaiarrentzat da: herritarrek gozatzeko, elkartzeko eta herriaz beste modu batean bizitzeko espazio berria".

Argi Yeregi hirigintza zinegotziak proiektua "herriko espazio publikoak berreskuratzeko estrategiaren barruan" kokatutzat jo zuen, eta Komentuko lorategiaren irekiera eta Mariantonen hasiko diren lanak ere estrategia beraren parte direla gaineratu zuen. Lorategiak Erkibe ingurua herrian integratzea, topagune berde bat sortzea eta jasangarritasuna eta klima kontuan hartzea ditu helburu nagusi.

Lorategia zabalik dagoen arren, Erkibeko etxearen etorkizuna erabakitzeko herri prozesua abian da. Herritarrekin eta merkatariekin lehen bilerak egin ondoren, ekoizleekin bilera izango da gaur. QR kode baten bidez galdetegia betetzera eta ideiak proposatzera animatu ditu udalak herritarrak. Entzute fasearen lehen ondorioak uda baino lehen aterako direla aurreikusi dute.