Prozesua bi fasetan gauzatu da: lehenik, herritarrek proposamenak egiteko kanal irekia izan dute, eta ondoren, parte-hartze saioak egin dira merkataritza eta ostalaritzako ordezkariekin, elkarteekin eta herritarrekin, jasotako kezkak kontrastatu eta sakontzeko.

Dinamika horretan identifikatutako arazo nagusien artean daude hiri-altzarien hondatzea, espazio publikoetako zikinkeria, grafitiak eta kartelak ugaritzea, zaratak eta mugikortasunaren gatazkak, eta jai-giroko ekitaldietan instalazioak zein espazio naturalak desegoki erabiltzea. Horiez gain, animaliekin elkarbizitzari lotutako zailtasunak eta berdeguneak zein ekipamenduak errespetatzeko arazoak ere azaleratu dira.

Jasotako ekarpenetan, elkarteek eta herritarrek hezkuntza, kontzientziazioa eta pedagogia lehenetsi dituzte, ingurunea errespetatzeko eta bizikidetza kaltetzen duten jokabideen sustraiak ulertzeko beharra azpimarratuta. Merkataritza eta ostalaritzaren esparrutik, berriz, garbiketa indartzea, segurtasuna hobetzea eta zaintza areagotzea nabarmendu dute, bereziki gaueko ordutegietan.

Oro har, adostasun zabala dago zigorrek azken baliabidea izan behar dutela esatean; horren ordez, sentsibilizazio kanpainak, bitartekaritza eta konponketa-neurriak hobesten dituzte, kaltea egin duenak berak konpontzea bezalako formulak barne. Hala ere, parte-hartze prozesuak agerian utzi du eztabaida irekia dagoela ordenantzaren beraren paperari buruz: batzuek kontzientziazioa indartzea nahikotzat jotzen duten bitartean, beste batzuek arau argiak eta ikuspegi pedagogikoa uztartuko dituen erregulazioa beharrezkotzat ikusten dute.

Udalak positibotzat jo du parte-hartze maila eta azpimarratu du jasotako ekarpenak baliagarriak izango direla benetako beharrak jasoko dituen zirriborroa osatzeko. Hurrengo fasean, testu hori aurkeztu egingo dute, erakundeekin baliozkotu eta herritarrekin kontrastatzeko; gaur egun, zirriborroa idazteko lanetan dabiltza. Informazio gehiago eta prozesuaren xehetasunak udalaren webgunean daude eskuragarri.