Urteak joan eta urteak etorri, Sanjuandegiko festetako egitarauan hutsik egin ez duen ekintza bat da zezen ikuskizuna. Aurten ere auzotarrek zezenaz gozatzeko aukera izango dute, baina pare bat berrikuntzarekin. Alde batetik, azken urteetan ez bezala, zezen handiak izango dira protagonista. Bestalde, igande arratsaldez egingo dute ekitaldia, 16:00etatik 17:30era, eta hesiz babestuta egongo da Jose Antonio Agirre plaza. Aurten ere Biri gandutegiko zezenak izango dira Sanjuandegin.
Xabi Iturralde, XJ Auzolanean batzordeko kidea, aldaketen arrazoiak azaldu ditu. Hasiera batean, igande goizean zezen txikien ikuskizuna egiteko asmoa bazuten ere, zezen txikien bueltako ekitaldien erregularizazio prozesu motelaren ondorioz, ezinezkoa zitzaigun antolatzea. Egoera horren aurrean, auzora zezen handiak eramateko ideiari heldu zion batzordeak.
Ohituraz, igandean, festetako azken egunean, goizean goiz izaten zen zezena Sanjuandegin, gaupasa egiten dutenen goiza "alaitzeko eta entretenitzeko". Azken urteetan, zezen txikiak erabili izan dituzte, jendea parte hartzera bultzatzen dutelako eta festa giroari eusten laguntzen diotelako, Denis Aizpuru XJ Auzolanean batzordeko kideak azaldu duenez. Iaz, ordea, bigantxen ikuskizuna prestatu zuten eta parte-hartzea "nahiko eskasa" izan zen. Horregatik, goizean zezen handien ikuskizuna antolatzeko aukera alde batera uztea erabaki zuten, eta ikuskizuna arratsaldera aldatuta, jende gehiago hurbilduko delakoan daude.
Garai bateko ohiturak bueltan dira, beraz, Sanjuandegin, nahiz eta ekitaldiaren ordua eta lekua bestelakoak izango diren. Auzoko festen nortasuna mantenduko duen eta horiei amaiera borobila emango dien hitzordua izango da zezenekin igandean egingo dutena. Sanjuandegiko festen ibilbide luzean, askotariko zezen ikuskizunak antolatu izan dituzte; hasierako urteetan, esaterako, sokamuturra zen auzoko ekitaldi izarra. Urte hainbatetako egitarauak aztertuz gero, zezenaren bueltako ekitaldiak ez du hutsik egin; larunbatean zein igandean, haurrentzako zezen txikien eta pottoken ekitaldia, suzko zezena edo errekortarien uztai txapelketa dira horren erakusle.
Ohituraren sokari segida emango dio aurtengo ekitaldiak: lehen aldiz igande arratsaldean Jose Antonio Agirre plazan izango da zezen handien ikuskizuna.
