Aurtengo edizioan, lehiaketak giza eskubideak, bakea, bizikidetza eta kulturartekotasuna ditu ardatz nagusi. Ekitaldia maiatzaren 17an izango da, igandea, San Agustin kultur gunean, 11:00etatik 13:00etara. Sari banaketa Maite Lopez eta Garazi Magunagoitia aurkezleek gidatuko dute, eta L'Atelier-eko dantzarien emanaldi batekin girotuko da.
Hamargarren edizio honek herriko gazteen parte-hartze zabala izan du berriro ere. Guztira, Durangoko bost ikastetxetako 450 ikasle inguruk hartu dute parte lehiaketan. Parte hartu duten ikastetxeak Zabalarra, Landako, Durangoko Institutua, Jesuitak eta San Antonio izan dira.
Ehun 'booktrailer' aurkeztu dira, bi adin-kategoriatan banatuta. A kategorian, 2012 eta 2014 artean jaiotakoentzat, 53 lan aurkeztu dira; B kategorian, 2008 eta 2011 artean jaiotakoentzat, berriz, 47 proposamen jaso dira. Horietatik guztietatik, 30 'booktrailer' aukeratu dira azken ekitaldian proiektatzeko, kategoria bakoitzeko 15.
Lehiaketaren helburua da sormenaren eta ikus-entzunezko lengoaiaren bidez gizarte-errealitate desberdinetara hurbiltzea, horiei buruzko hausnarketa eta ezagutza sustatuz.
Galaren zehar hainbat sari banatuko dira. Alde batetik, A kategoriako 'Book Trailer' onenaren saria emango da, 300 euro eta liburu sorta batekin. Era berean, B kategoriako 'Book Trailer' onenak ere 300 euro eta liburu sorta bat jasoko ditu. Horrez gain, gidoi onenaren saria ere emango da, 300 euro eta liburu sorta batekin. Bestalde, bertaratutako publikoak zeregin garrantzitsua izango du ekitaldian, Publikoaren Sariaren aukeraketan parte hartu ahal izango baitu. Lan irabazleak liburu elektroniko bat jasoko du taldeko kide bakoitzeko.
