Oikiak San Bartolome egunaren ospakizunak hasi ditu gaur, eta datorren ostiralera arte luzatuko dira ekitaldiak. Gaur ospatuko dute egun handia auzoan, eta egitarauari meza nagusiarekin ekingo diote. Ondoren, Errotaberri bertso eskolakoek emanaldia eskainiko dute. Arratsaldean, berriz, asto probak izango dira ikusgai, eta Elustondo anai-arrebek emango diote amaiera egunari erromeriarekin.
Atzo ere izan zen zer ospaturik auzoan. Arratsaldean, herri kirol jaialdiak hartu zuen plaza. Olaia eta Lorea Esnaola harri-jasotzen aritu ziren, eta Mujika-Bihurri eta Kortxero-Mugertza bikoteek aizkorako desafioa egin zuten. Jarraian, idi probak izan ziren, Etxabe eta Bixkiren eskutik.
Gaurko egitaraua osatu dute: 11:00etan meza, 12:30ean Errotaberri Bertso Eskolakoen emanaldia, 18:00etan XXXVI. Asto probak (Artabilla, Peio, Muniosoro, Bentuene), eta 22:30ean erromeria Elustondo anai-arrebekin.
Bihar, asteartea, umeentzako puzgarriak (11:00-14:00), umeen bazkaria (14:00), XVIII. Karrikotxe jaitsiera (15:30), ekintzez betetako guneak (ur jolasak, eskulanak, abileziak, argazki txokoa), txokolatada, afari legea plazan eta karaokea (20:30), eta V. Zokormazo afaria (21:00) izango dira.
Ostiralean, abuztuak 28, San Agustin eguna eta Blusa eguna ospatuko dituzte. Egitarauan, 11:00etan meza, 12:00etan herritarren arteko herri kirolak, goizean zehar Enaitz Alberdi eta Erkizi trikitilariak, 14:30ean paella jana, bingoa bazkalondoan, umeen txokoa GUKAren eskutik (17:00), Auxtinpotin arratsaldean, erromeria Izer eta Alabier trikitilariekin (22:30) eta Txin-txin herrikoia gauerdian.
