Kantauri Itsasoko antxoaren arrantza kanpaina amaitu da, eta Kofradia Itsas-Etxea zentroak jakinarazi duenez, asteburu honetan bertan atera dira itsasontziak hegaluzearen kosterara. Antxoaren kanpaina "bereziki positiboa" izan dela adierazi dute, iaz ezarritako kuota kudeatzeko sistema berriari esker. Sistema honek "batez besteko prezioa kiloko 1,89 eurotan mantentzea lortu du, balio hori 2013tik erregistratu gabe zegoelarik".
Zentroak azpimarratu duenez, kuota Euskal Autonomia Erkidegoan bertan kudeatu ahal izateak eraginkorrago jarduteko aukera eman du. Datu zehatzen arabera, "Bizkaia eta Gipuzkoak eskura zuten kuotaren %93 kontsumitu dute, 8.023.119 kilo hain zuzen ere. Estatuan, berriz, kontsumoa % 70,58koa izan da, 21.481.461 kilokoa".
Gipuzkoari dagokionez, inguraketa-flotak 2.468.372 kilo saldu ditu Getariako, Pasaiako eta Hondarribiko lonjetan. Antxoaren kanpainarekin zerikusi gutxi izan du, ordea, berdelarenak. Emaitzak "oso kezkagarriak" izan direla esan dute, eta eragin zuzena izan dutela amu eta inguraketa-arte txikiko ontzietan, beren urteko diru sarrera iturri nagusietako bat baita berdelaren arrantza.
Euskal arrantzaleak prestaketa lanetan aritu dira moiletan, eta dagoeneko euskal flotaren %90 itsas zabalean dago. Aurreneko hegaluzeak Bermeo eta Hondarribia bezalako portuetara iritsi badira ere, "lehen deskarga puntualak" izan direla nabarmendu dute, eta oraindik ez direla esanguratsuak.
Kanpainaren aurrean baikor agertu dira. "Sektoreak baikortasun handiarekin ekin dio kanpainari, eta datozen asteetan euskal portuetan harrapaketak eta deskargak pixkanaka areagotzea espero dugu. Antxoarenarekin batera, arrantzaleentzat eta baxurako arrantza sektorearentzat urteko garrantzitsuena da kostera hau". Gogorarazi dute Eusko Label kalitate zigiluak eta MSC jasangarritasun ziurtagiriak bermatzen dutela produktuaren kalitatea.
