Eusko Jaurlaritzak 2,5 milioi eurotik gora bideratuko ditu Donostiako portua modernizatzera eta indartzera, portuko jarduerarako eta herritarren erabilerarako funtsezkoak diren espazioen segurtasuna, egonkortasuna eta funtzionaltasuna hobetzeko helburuarekin.
Amaia Barredo Elikadura, Landa Garapen, Nekazaritza eta Arrantza sailburuak iragarri duenez, Elikadura, Landa Garapen, Nekazaritza eta Arrantza Sailak sustatutako inbertsioa 2.554.105 eurokoa izango da. Lanek Erreal Klub Nautikoko kaia eta portuko ontziralekua berritzea, erdiko kaiaren egitura indartzea eta ontziralekuko eskaileraren azken zatia berritzea jasotzen dute.
Azpiegituren erabilera bizitza luzatzea, erabiltzaileen segurtasuna bermatzea eta itsas ingurune zorrotzaren eskakizunetara egokitzea dira helburuak. Lehen lana, portuko ontziralekuko eskaileraren azken zatia berritzea, dagoeneko hasi da. 107.343 euroko inbertsioarekin eta hiru hilabeteko exekuzio epearekin, egungo egitura ordezkatuko da metalezko eskailera berri batekin, itsasoaren eraginaren aurrean segurtasun, erresistentzia eta iraunkortasun handiagoa eskainiko duena.
Bigarren lan nagusia, 2027aren hasieran abiaraziko dena, portuko erdiko kaiaren egitura indartzeari zuzenduta egongo da. 1,1 milioi euroko inbertsioarekin eta bederatzi hilabeteko exekuzio epearekin, arrantza dartsena eta kirol portua bereizten dituen 362 metroko azpiegitura estrategikoan jardungo da. Zimenduen indartzea, kaiaren egitura sendotzea eta harri naturaleko horma atalak konpontzea aurreikusten dira.
Tamaina handieneko lana, 2028ko lehen hiruhilekotik aurrera gauzatuko dena, Erreal Klub Nautikoko kaiaren eta portuko ontziralekuaren erabateko berritzea izango da, 1,34 milioi eurotik gora inbertituz. Ia 100 metroko kaia konpondu eta indartuko da, baita ontziralekuaren erabateko berrikuntza ere, hondatutako egitura elementuak ordezkatuz eta gazitasunaren ondoriozko korrosioa jasan duten osagaiak hobetuz.
Lan hauek portuko jardueren lan baldintzak eta funtzionamendua hobetzeaz gain, Donostiako itsasertzaren gune jendetsuenetako batzuen segurtasunean eta erabilera kalitatean eragin zuzena izango dute. Jaurlaritzak portuak zaintzeko, modernizatzeko eta balioan jartzeko duen konpromisoa berresten du, haien jarduera ekonomikoa sendotzen eta etorkizuneko beharretara egokitzea bermatzen duten ekintzak sustatuz.
