Zumaian jokatu da gaur Euskadiko Piraguismo Txapelketa Maratoia, 70 piraguista baino gehiagok parte hartu dutelarik. Itsas kiroldegitik abiatu da lehia, aurreikusitakoa baino ordubete lehenago hasi dena, eguraldi beroaren eraginez. Bertako piraguistek hainbat domina eskuratu dituzte proba honetan.
Itxas Gain elkarteak antolatutako proban parte hartu duten kirolariek zale ugariren animoak jaso dituzte. Ikusleek, berriz, herriko piraguismo elkarteak jan-edanerako jarri duen guneaz gozatzeko aukera izan dute.
Txapelketa 10 klubetako kirolariek jokatu dute, kadete, jubenil, senior eta beteranoen kategorietan. Kadeteek 14 kilometroko distantzia bete dute hiru eramate edo porteorekin; jubenilek eta beteranoek 17 kilometro, hiru eramaterekin; eta seniorrek, berriz, 20 kilometro egin dituzte, lau porteorekin.
Irteera, helmuga eta porteoak Itsas kiroldegi aurrean egin dituzte. Ziabogak emateko buiak Bedua inguruan, Txomin Agirre kaian eta trenaren zubitik 300 kilometrora jarri dituzte.
Urrezko domina lortu dute Amaia Aizpurua kadeteak, Irati Osa seniorrak, Asier Aizpurua eta Maite Etxabek osatutako bikoteak (senior mailako kategoria mistoan), Haritz Aizpuruak eta Xabat Bergarak (K2 seniorren gizonezko kategorian), Eider Amundarainek (20 kilometroko banakako proban), Vicente Royo eta Iñigo Lois bikoteak (beteranoetan) eta Oier Aizpurua eta Eñaut Aizpurua beteranoek.
Sailkapen guztiak ikusgai daude emakida honetan: https://emaitzak.euskalkanoe.com/index.php?view=regata&token=&id=1:2026:5:1
