Elkar-ekin elkarteak prest ditu Soreasuko Elkargunea eta Arropagunea ikasturte berrirako. Azken urteetan egindako lanari eutsiz, zerbitzuak hobetzen saiatuko dira, gero eta erabiltzaile gehiagoren beharrei erantzuteko.
Arropagunea-k herrian behar gehien duten pertsonei arropa doan banatzen die, urte hasieran ematen den bonu baten bidez. Bonu horrekin, erabiltzaileek urtean zehar behar duten arropa jaso dezakete dendaren ordutegian. Gainera, herritar guztientzat bigarren eskuko arropa eskaintzen da, merke eta txukun.
Elkargunea-ren helburua etxeetan oinarrizkoak diren materialak modu merkean eskaintzea da. Etxeetan erabilgarri dauden baina erabiltzen ez diren materialak biltzen jarraituko dute, hala nola altzariak, koltxoiak, sukaldeko tresnak, jolasak, bizikletak, liburuak eta ordenagailuak.
Elkargunea ostiraletan 16:00etatik 20:00etara eta larunbatetan 10:00etatik 13:00etara egongo da zabalik. Arropagunea berriz, astearteetan 11:00etatik 13:00etara eta 17:00etatik 19:30era; asteazken eta ostegunetan 17:00etatik 19:30era; ostiraletan 16:00etatik 20:00etara; eta larunbatetan 10:00etatik 13:00etara.
Proiektuan boluntario gisa parte hartzeko aukerak ugariak dira. Astelehenetan arropa antolatu eta Elkargunea txukuntzen da, eta astearteetan biltegiko eta hornitze lanak egiten dira. Ostiral eta larunbatetan Elkargunea irekitzeko txandak antolatzen dira, eta urtean bitan, Errigoraren kanpaina eta produktuen banaketa egiten dute.
Elkar-ekinek jende gehiago animatu nahi du boluntario izatera, malgutasun osoa eskainiz bai egutegiaren bai ordutegiaren aldetik. Interesa dutenek harremanetan jarri daitezke elkar_ekin@hotmail.com helbidera, 644 96 16 06 telefono zenbakira Whatsapp edo Telegram bidez, edo Elkargunean bertan ohiko ordutegian.
