Durangoko Udaleko Haur Kontseiluak bere ikasturteko azken bilera egin zuen aste honetan. Bertan, gazteek beraiek sortu eta antolatutako "Durango Tour" ekimenaren balorazio zehatza egin zuten, Durangoko Udalaren laguntzarekin.

Kontseiluko kideek esperientzia oso positiboa izan dela adierazi dute, batez ere parte-hartzaileei eskainitako informazioaren argitasuna, ibilbidearen antolaketa ona, gida gazteen inplikazioa eta udalerria lehen aldiz bisitatzen dutenei integrazioa eta ezagutza sustatzeko duen gaitasuna nabarmenduz. Era berean, etorri berriei ematen zaien harrera eta haurrek komunitateko bizitzan aktiboki parte hartzeko aukera baloratu dute.

Duela hilabete egin zen "Durango Tour"-en lehen proba pilotua. 10 eta 12 urte bitarteko haurrek gidatutako ibilbidean, parte-hartzaileek udalerriko gune enblematikoak eta Durangoko eguneroko bizitzako alderdiak ezagutu ahal izan zituzten. Jarduerak ordu bat eta berrogeita hamar minutu inguru iraun zuen eta Udaletxeko arkupetan partekatutako hamaiketako batekin amaitu zen. Haur Kontseiluak ekimenari jarraipena eman nahi dio.

Haur Kontseiluak azpimarratu du "Durango Tour"-ek bere helburua betetzen duela: udalerria etorri berriei hurbiltzea eta haurrak Durango hobeago baten eraikuntzan inplikatzea. Udal Korporazio osoak bere esker ona adierazi die Kontseiluko kideei ekimenarekiko duten dedikazioagatik eta konpromisoagatik.