Asteak hainbat jarduera jasotzen ditu, hala nola erakusketa bat, bidezko merkataritzako txokolate-dastaketa, dokumental-forum bat eta Derandeinen ohiko martxa solidarioa.
Aurten, ekimenak gure kontsumo-ohituretan eta horiek nazioarteko lankidetzarekin duten harremanean jarriko du arreta, bereziki ehungintzaren sektoreari erreparatuta. Helburua da kontsumo arduratsuaren garrantzia nabarmendu eta berrerabiltzea, konpontzea eta birziklatzea bezalako ekintzak sustatzea.
Sonia Cabezas Gizarte Ekintzako zinegotziak azaldu duenez, "lankidetza ez da soilik beste herrialde batzuetan egiten diren garapen-proiektuetara mugatzen; gure eguneroko praktikei begiratzera ere gonbidatzen gaitu, eta gure kontsumo-ereduaren eta beste pertsona batzuen errealitateen artean dagoen harremana ulertzera".
Egitaraua irailaren 28tik urriaren 4ra Zelaietako erakusketa aretoan bisitatu ahal izango den erakusketa batekin hasiko da. Bertan, Amanecer Solidario (ASOL), Derandein, EDUCAS, Euskal Fondoa, Kidenda, Munduaz Blai eta UNRWA erakundeek parte hartuko dute.
Gainera, liburutegiak irailaren 30era arte irakurketa-gune bat izango du, eta irailaren 30ean bidezko merkataritzako txokolate-dastaketa bat egingo da Zelaietan.
Urriaren 1ean, Zelaietan "Ropa sucia" dokumental-foruma izango da, moda azkarraren ondorioak eta ehungintzako industriako lan-baldintzak aztertuz. Ekitaldiak solasaldi-gune bat izango du amaieran.
Egitaraua osatzeko, Kidenda eta Munduaz Blai erakundeen bidezko merkataritzako postuak, Gazte Txokon Mendebaldeko Saharari buruzko tailerra eta Derandeinen mendiko martxa eta pintxo-pote solidarioa izango dira urriaren 4an.
