Durangoko udal plazaren estetika eta neurria aldatu egingo dira laster, Durangoko Udalak eraikin zaharra eraitsiko baitu urrian zehar. Egutegi aurreikusitakoaren arabera, hilabetearen hasieran hasiko dira eraikinaren barrualdea botatzen, eta kanpoaldea, berriz, San Faustoak amaituta botako dute.
Eraikinaren eraistea amaitutakoan, plaza handitzeko eta berritzeko lanak egingo dira. Udalak kalkulatu duenez, lanek bost hilabete inguru iraungo dute, eta aurreikusitako inbertsio osoa 428.800 eurokoa da.
Udal iturriek azpimarratu dutenez, plaza handitzeak eta hobekuntzak egiteak espazio publikoaren kalitatea igoko du. Horien artean, harrizko eserleku beltzak, gingko biloba zuhaitzak eta ur-elementuak jarriko dituzte.
Udaletxeko balkoiaren aurrean, fatxada huts bat geratuko da, eta bertan ispilu itxurako egitura bat jartzea aurreikusten dute.
“"Proiektu honek herritar guztien gozamenerako espazio zabalago, inklusiboago eta prestatuago bat berreskuratzea ahalbidetuko du, tokiaren memoria eta plaza bizitzeko modu berri bat uztartuz."
