Ekimen integral honek 430 hektarea inguru hartuko ditu, batez ere Urdaibaiko Itsasertzak eta Padurak Kontserbazio Bereziko Eremuan (KBE). Egungo kartografiaren arabera, espezie exotiko inbaditzaileak dagoeneko 130 hektareatan hedatuta daude. Horien artean, Baccharis halimifolia (93 hektarea) eta Cortaderia selloana (19 hektarea) dira nagusiak.
Foru Aldundiak, Basalan elkartearen bitartez, lana martxan jarri du eta lehen esku-hartzeak Busturiako San Kristobal eta Foruko sektoreetan egiten ari dira. Helburua ez da soilik landare inbaditzaileak kentzea, baizik eta eremua berreskuratzea eta etorkizunean berriro ez zabaltzeko jarraipen estua egitea.
Lan horiek espezie bakoitzaren egoeraren arabera egokituko dira, eskuz zein makinez eginez, bertoko ekosisteman ahalik eta kalte txikiena eragiteko. Gainera, dronak eta teknologia aurreratua erabiliko dira landaretzaren garapena kontrolatzeko eta aztertzeko.
Hasiera batean lau pertsonako lantaldeak egingo du lan, baina maiatza eta iraila bitartean, lanaren intentsitatearen arabera, 20-25 langile izatera iritsiko da.
Espezie inbaditzaileek bertoko flora ordezkatu eta habitat naturala eraldatzeko gaitasuna dute. Horregatik, lanak amaitzean, landare autoktonoak berriz landatuko dira ingurunea leheneratzeko. Bizkaiko Foru Aldundiak sentsibilizazio kanpaina ere abiatuko du eskualdeko udalekin eta herritarrekin, espezie hauek identifikatzen eta haien hedapena ekiditen laguntzeko.
