Remigio Mendiburuk sortutako Udarregi bertsolariaren omenezko eskulturak 60 urte beteko ditu laster, 1966ko maiatzaren 22an inauguratu baitzen. Urteurren hori dela eta, NOAUA! Kultur Elkarteak eta 650 Usurbil Bizi herri ekimenak hainbat jarduera antolatu zituzten maiatzaren 15erako eta 22rako.

Hala ere, maiatzaren 15erako aurreikusitako lehen hitzordua maiatzaren 17ra, igandera, atzeratu da. Atzerapen horren arrazoia EAEko ikuskizun eta ekitaldien sektoreak ostiral honetan egingo duen greba da. Teknikariok, ESK, LAB, UGT, ELA eta CCOO sindikatuek deitu dute greba, sektoreko egiturazko prekarietatea salatzeko eta lehen hitzarmen kolektibo duina eskatzeko. Artistei eta ikus-entzuleei ekitaldietara ez joateko eskatu diete.

Beraz, “Euskararen eta artearen Usurbil. Rikardo Arregiren oihartzuna 60 urte geroago” zikloko lehen saioa, Oskar Alegriaren Oteiza 14 apostolu filmaren emanaldia eta ondorengo solasaldia, maiatzaren 17an izango da, Sutegiko auditorioan, arratsaldeko 19:00etan. Solasaldian Oskar Alegria zuzendariak eta Jorge Oteiza Fundazioko patronatuko presidenteak parte hartuko dute. Sarrerak 6 eurotan eros daitezke aurrez usurbilkultura.eus webgunean edo NOAUA! Kultur Elkartearen egoitzan, eta bazkideek 4 eurotan.

Bigarren ekitaldia, maiatzaren 22an, ostiralean, mantentzen da. Egun horretan, 18:00etan, Zutik film laburra proiektatuko da Sutegiko auditorioan. Film honek Rikardo Arregik 1966an Usurbilen emandako hitzaldi gogoangarria du oinarri. Ondoren, Naiz Irratiak gidatutako solasaldia egingo da, Ainara Mendiola (filmaren zuzendaria), Ismael Manterola (Arte Ederren Fakultateko dekanoa) eta Idurre Eskisabel (Euskalgintzaren Kontseiluko idazkari nagusia) parte-hartzaileekin. Ekitaldia Remigio Mendibururen eskulturan amaituko da, Maialen Lujanbio eta Jakoba Errekondo parte-hartzaileekin. Sarrerak doakoak izango dira usurbilkultura.eus plataforman.