Usurbil K.E.-ren bazkideek ohiko batzarrean parte hartuko dute ekainaren 20an, goizeko 10:30ean, Potxoenean. Bertan, 2025/2026 denboraldiaren kirol balantzea eta 2026/2027 denboraldiaren aurreikuspenak aztertuko dituzte. Halaber, diru-kontuak eta zuzendaritza zein bazkideen proposamenak landuko dira, galdera-eskaerak egiteko tartea ere izango delarik.
Bestalde, eskubaloi taldeetan parte hartu nahi dutenentzako matrikulazio epea zabalik du elkarteak hurrengo 2026-27 denboraldirako. Izena emateko azken eguna ekainaren 19a, ostirala, da. Interesatuek galdetegia bete beharko dute, eta aurrerago ate irekiak antolatuko dituzte jokalari berriek probatzeko aukera izan dezaten.
Gainera, Julen Lejardi eskubaloi kanpusa antolatu du Usurbil K.E.-k ekainaren 22tik 26ra bitartean, 09:00etatik 12:30era. Lehen Hezkuntzako eta DBH 1-2 mailetako ikasleei zuzenduta, kirola modu ludiko eta dibertigarrian ezagutaraztea du helburu. Antolatzaileek jakinarazi dute gonbidatu bereziren bat egon daitekeela eta izen-ematea zabalik dagoela.
Argibide gehiago behar dituztenek usurbilkirolelkartea@gmail.com helbidera idatzi edo 610 003 227 telefono zenbakira deitu dezakete. "Animatu eta zatoz eskubaloiaz gozatzera!", egin dute gonbita.
