Madalenak 2026 jaiak direla eta, Errenteriako Udala k hainbat neurri praktiko ezarri ditu herritarren erosotasuna eta segurtasuna bermatzeko. Trafikoan aldaketak egongo dira, eta zenbait zerbitzu egokitu egingo dira jai egitaraua dela eta.
Trafiko mozketa nagusiak honakoak izango dira: Touring etorbidea zirkulaziorako itxita egongo da barrakak jartzeko uztailaren 27ra arte. Erdialdea eta Nafarroa Etorbidea, berriz, hilaren 21ean itxiko dira goizeko 06:30etik aurrera, eta hilaren 26an garbitu ondoren irekiko dira berriro.
Hiri barruko garraioari dagokionez, Xenpelar eta Morrongilletako geralekuak Tulle kaleko geralekura eramango dira uztailaren 21eko 07:00etatik 26ko 07:30era bitartean. Niessen, Alameda, Gabierrota eta Fanderia geltokiak bertan behera geratuko dira aldi horretan. Lartzabal auzoa, 19 ko geralekua ere eten egingo da hilaren 16tik 28ra, Touring-a eteteagatik.
Hiriarteko garraioan, Lurraldebuseko hainbat linea (E02, E04, E20, E26, E27, E72 eta E77) zuzenean joango dira Galiziako biribilgunetik Lartzabaleraino eta alderantziz, Nafarroa hiribidea itxita egongo delako uztailaren 21eko 07:30etik 26ko 13:00ak arte. Horrek Zumardia, Gabierrota eta Lartzabalgo geltokiak bertan behera uztea ekarriko du bi norabideetan.
Gaueko autobus zerbitzua indartu egingo da herriko auzo guztietara iristeko. Garajeetako erabiltzaileek ohiko moduan egin ahal izango dute sarrera eta irteera, eta argibiderik behar izanez gero, Udaltzaingora deitu daiteke. Taxiek ohiko geltokia izango dute Nafarroa hiribideko 69b zenbakian, eta jaietan zehar beste geltoki bat jarriko da Santa Klara biribilgunearen ondoan.
TAO zerbitzua eten egingo da uztailaren 21etik 26ra. Merkatuzarreko aparkalekua itxita egongo da uztailaren 18tik 25era, plazen jabeentzat izan ezik. Aparkaleku alternatiboak eskainiko dira Tellerialde ikastetxean, Arramendi Parkean eta Euskaltegiaren atzealdeko kirol pistako aparkalekuan, ordutegi zabalekin.
Zamalanetarako, trafikoari itxita dauden guneak 08:00etatik 12:00etara irekiko dira. Ekitaldi puntualengatik (su artifizialak, konpartsak, danborradak) trafikoa moztu ahal izango da, ahalik eta eragin txikiena sortzeko saiakerarekin. Papresa barrutik Nafarroa etorbidera pasatzen den bidea ere itxita egongo da jaietan zehar, eta oinezkoek ezingo dute sartu gaueko 22:00etatik goizeko 08:00ak arte.
Azkenik, uztailaren 20tik 25era bitartean, herriko igogailu guztiak martxan egongo dira gauez ere, 24 orduz mugikortasuna errazteko. Komun publikoak ere 24 orduz egongo dira irekita.
