Lasarte-Oria prest dago ekainaren 6an ospatuko den V. Ford Ibilgailu Klasikoen Kontzentrazio Nazionala hartzeko. Ekitaldia Andatza plazan izango da, eta motor klasikoari eskainitako egun osoko egitaraua izango du, ibilgailuen erakusketa, ibilbideak, hitzaldiak eta kontzertuak barne.
Aurreko edizioetan Ezcaray, Santiago de Compostela, Ampudia edo Villablino bezalako herriek hartu dute ekimena. Udal arduradunek nabarmendu dute Lasarte-Oria ren aukeraketa, udalerriak automobilgintzarekin duen lotura historiko estua gogoraraziz. Horren harira, XX. mendearen hasierako erreferente izan zen Lasarteko zirkuitu zaharra eta Michelin fabrikaren eginkizuna gogora ekarri dituzte.
“"Ekintza hauek udalerriaren bizitza dinamizatzen laguntzen dute, bisitariak erakartzen eta motorrarekin lotutako gure historia balioan jartzen."
Txus Alonso, Jaietako zinegotziak, adierazi du Udalak mota honetako ekintzak babesten jarraituko duela, herritarren artean sortzen duten interesagatik eta balio handiko ibilgailu historikoak Lasarte-Orian ikusteko aukeragatik. Udalak 2.400 euroko hitzarmen baten bidez eta beharrezko laguntza tekniko eta logistikoarekin babesten du antolakuntza.
Egitarauak ibilgailu klasikoen erakusketa bat jasotzen du Andatza Plazan, udalerrian zeharreko ibilbide bat eta publikoarentzat irekitako hainbat jarduera. Horien artean, Michelin-en eskutik hitzaldi bat izango da auditorioan, fabrikaren historiari buruzko ikus-entzunezkoak proiektatuz, sarrera librea izango delarik. Jardunaldia Andatza Plazako kioskoan kontzertuekin amaituko da.
Kontzentrazioak Estatuko hainbat puntutatik iritsitako Ford auto klasikoen zaleak eta jabeak bilduko ditu, eta erreferentziazko topaketa bihurtu da motor klasikoaren egutegi nazionalean.
