Larunbatean hasi zen txapelketa, Goiz Eguzki taldearen eta gainerako gonbidatuen ongietorriarekin. Ekitaldiari hasiera emateko, aurreskua dantzatu zuten eta abesbatzak girotu zuen jardunaldia. Guztira, 25 partida jokatu ziren larunbatean eta igandean, kirolarien arteko harremanak estutzeko helburuarekin.
Lehiaketa amaitzean, antolatzaileek urrezko domina bana eman zieten parte-hartzaile guztiei. Sari banaketan nabarmendu zutenez, 70 eta 88 urte bitarteko jokalarien esfortzua eta kiroltasuna aitortu nahi izan zituzten, denak txapeldun gisa sarituz.
Denboraldiari amaiera emateko, Goiz Eguzki Hartubol Taldeak ate irekien jardunaldia antolatu du biharko. Hernaniko kiroldegian egingo den saio honetan, inguruko herrietako jubilatu elkarteetako kideak gonbidatu dituzte, hartubolaren praktika sustatzeko eta talde berriak sortzeko asmoz.
