Manifestu honek, Euskal Herria Bizirik sareak bultzatuta, industrializazio berdearen ereduari kritika egiten dio eta lurraren defentsaren aldeko konpromisoa berresten du. Sinatzaileek, besteak beste, AHT ren eta proiektu eolikoen aurkako elkarteek, nekazaritza industrialaren eta erregai fosilen erabilera masiboaren ondoriozko larrialdi ekologikoa azpimarratzen dute.
“"Gizakiaren biziraupenerako ezinbestekoak ditugun ekosistemetan eragiten ari garen sakoneko aldaketak, gaur egun bizi dugun larrialdi ekologikora ekarri gaituzte."
Dokumentuak adierazten duenez, Lur planetaren bederatzi muga biofisikoetatik zazpi jada segurtasun-eremutik kanpo daude, gizakiak ingurune naturalarekin duen harremanaren ondorioz. Nekazaritza industrialak nitrogeno eta fosforoaren zikloaren alterazioa, desertifikazioa, biodibertsitatearen galera eta ur gezaren eskuragarritasun arazo larriak eragin dituela ere nabarmentzen dute.
Eragileek ohartarazi dute egungo ekoizpen eta kontsumo mailari eusteko erregai fosilak ezinbestekoak direla, eta larrialdi ekologikoa gainditzeko ez dela nahikoa egungo matrize energetikoa aldatzea, baldin eta ekoizpen eta kontsumo ereduak zalantzan jartzen ez badira.
“"Klima larrialdiaren urgentzia bereganatzen saiatu dira Green New Deal moduko esloganekin industrializazio 'berde' bat aurrera eramateko beharrari azpimarra eginez. Horrela, larrialdi ekologikoa klima larrialdira mugatu dute, bake soziala lortu eta merkatu-nitxo bat aktibatzeko asmoz."
Testuinguru horretan, hainbat makroproiektu kokatzen dituzte, hala nola biometanizazio plantak, datu zentroak, AHT, Petronor ren elektrolizatzailea, Olazti ko erraustegia eta Gatika ko interkonexio elektrikoa, guztiak irabazi ekonomikoaren logikan oinarrituta, ongizate soziala alde batera utzita.
Azkenik, Euskal Herria Bizirik sareak herritarrei dei egin die maiatzaren 23an Gasteizen egingo den Makroproiekturik ez! mobilizazioan parte hartzera. Protestaren helburua lurraren defentsa aldarrikatzea eta erakundeek eta korporazio handiek bultzatutako ingurune naturalen eta landa-eremuaren suntsiketa gelditzea da.
